Relato di prensa
Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 17 di mei 2023, CMM a dicidi pa mantene e tasa di e reserva obligatorio na 25,5 porciento entrante 1 di juni 2023. Di e manera aki, e banconan comercial mester tene un balansa minimo na BCA cu ta igual na 25,5 porciento di e depositonan riba termino cortico di nan clientenan. E decision pa mantene e reserva obligatorio na 25,5 porciento ta basa primordialmente riba un caida den e estimacion di likides excesivo di e sector bancario comercial na april 2023 compara cu december 2022. BCA ta sigui monitorea e desaroyo den e likides excesivo y lo por dicidi di cambia e tasa di reserva obligatorio, si ta considera esaki necesario.
E CMM a considera e siguiente informacion y analisis den su deliberacion.
Reservanan internacional y oficial
E reservanan internacional, cu ta consisti di reservanan oficial di BCA y reservanan di divisa na e banconan comercial, a baha cu Afl. 73,9 miyon te cu 28 di april 2023, compara cu fin di december 2022 (Grafico 1). E reservanan oficial a mengua cu Afl. 19,1 miyon, mientras cu e reservanan na banconan comercial a disminui cu Afl. 54,8 miyon. Consecuentemente, te cu 28 di april 2023, e reservanan oficial y internacional a suma Afl. 2.771,7 miyon y Afl. 3.167,3 miyon, respectivamente.
Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, apesar di e caida menciona anteriormente, reservanan internacional a keda ampliamente riba e rekisito di tres luna di pago riba e cuenta coriente di e balansa di pago den april 2023. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1).
| Tabel 1: Metriconan relata na reservanan observa den 2023 | |||||||||||||
| jan | feb | mar | Apr | ||||||||||
| Cobertura estima di pagonan riba cuenta coriente¹ | 7,1 | 6,9 | 6,7 | 6,9 | |||||||||
| Metrico estima di FMI ARA2 | 102,7 | 101,4 | 105,6 | 110,2 | |||||||||
| ¹ E cantidad di luna di pagonan riba cuenta coriente cu e reservanan internacional ta cubri.
² E proporcion entre e nivel di reservanan oficial y e nivel minimo adecua (conforme FMI), den porcientonan. |
Inflacion
Inflacion, midi na final di luna contra e luna di e aña anterior, a resulta na 5,9 porciento den maart 2023 (februari 2023: 7,1 porciento) (Grafico 2). E aumento den prijs di consumo na maart 2023 compara cu maart 2022 tabata causa primordialmente door di e crecemento den prijs di utilidad, cu a sigui afecta e componente di ‘vivienda’ (contribuyendo cu 2,9 punto di porcentahe). Tambe e prijs pa compra di vehiculonan a subi, impactando e componente di ‘transporte’ (contribuyendo cu 1,3 punto di porcentahe), mientras cu prijs di e componente ‘cuminda y bebida no alcoholico’ tambe a aumenta (contribuyendo cu 1,2 punto di porcentahe).
E inflacion midi riba promedio di 12 luna a subi te na 6,2 porciento na maart 2023, compara cu 6,1 porciento na februari 2023. E presion inflacionario tabata debi na e nivel eleva di prijs di petroleo riba mercadonan internacional, vehiculonan mas caro, y e aumento den prijs di awa y coriente desde augustus 2022. Ademas, Aruba a importa un gran parti di e crecemento den prijs for di su partnernan comercial, particularmente Estados Unidos y Europa.
Mientrastanto, na maart 2023, inflacion basico (excluyendo cuminda y energia) a alcansa 2,4 porciento (februari 2023: 3,0 porciento) si midi e final di respectivo luna contra e mes un luna di e aña anterior. Basa riba un promedio di e ultimo 12 lunanan, inflacion basico tambe a yega na 2,4 porciento (februari 2023: 2,4 porciento).
E total di likides excesivo di e banconan comercial a desminui di Afl. 819,7 miyon na december 2022 te na Afl. 649,2 miyon na maart 2023, continuando riba e tendencia di bahada observa durante 2022 (Grafico 3). Di otro banda, un estimacion preliminario di likides excesivo na april 2023 a indica un expansion di Afl. 83,4 miyon compara cu maart 2023. Esaki ainda ta nifica un caida compara cu december 2022. Sinembargo, likides excesivo a permanece riba (+Afl. 429,4 miyon) e nivel estima cu e banconan comercial posibelmente ta desea di mantene pa motibonan di cautela.
Banco Central di Aruba
12 di juli 2023
