Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 24 di maart 2023, CMM a dicidi pa mantene e tasa di e reserva obligatorio na 25,5 porciento entrante 1 di april 2023.
Di e manera aki, e banconan comercial mester tene un balansa minimo na BCA cu ta igual na 25,5 porciento di e depositonan riba termino cortico di nan clientenan. E decision pa mantene e reserva obligatorio na 25,5 porciento ta basa primordialmente riba un caida den e estimacion di likides excesivo na februari 2023 compara cu december 2022. BCA lo sigui monitorea e desaroyo den e likides excesivo den e siguiente lunanan y lo por dicidi di cambia e tasa di reserva obligatorio, si ta considera esaki necesario.
E CMM a considera e siguiente informacion y analisis den su deliberacion:
Reservanan internacional y oficial
E reservanan internacional, cu ta consisti di reservanan oficial di BCA y reservanan di divisa na e banconan comercial, a baha cu Afl. 90,1 miyon te cu 3 di maart 2023, compara cu fin di december 2022 (Grafico 1). E reservanan oficial a mengua cu Afl. 87,8 miyon, mientras cu e reservanan na banconan comercial a disminui cu Afl. 2,3 miyon. Consecuentemente, te cu 3 di maart 2023, e reservanan oficial y internacional a suma Afl. 2.703,1 miyon y Afl. 3.151,1 miyon, respectivamente.
Pa sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, apesar di e caida menciona anteriormente, reservanan internacional a keda ampliamente riba e rekisito di tres luna di pago riba e cuenta coriente di e balansa di pago den februari 2023. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1).
Inflacion
Inflacion, midi na final di luna contra e luna di e aña anterior, a resulta na 6,6 porciento den januari 2023 (december 2022: 5,7 porciento) (Grafico 2). E aumento den e Indice di Prijs di Consumo (IPC) na januari 2023 compara cu januari 2022 tabata causa door di e crecemento den prijs di utilidad, cu a sigui afecta e componente di ‘vivienda’ (contribuyendo cu 3,1 punto di porcentahe). Tambe e prijsnan den e componente ‘cuminda y bebida no alcoholico’ a aumenta (contribuyendo cu 1,4 punto di porcentahe), mientras cu prijs di gasoline a subi, cu na su turno ta influencia principalmente e componente di ‘transporte’ (contribuyendo cu 1,3 punto di porcentahe).
E inflacion midi riba promedio di 12 luna a subi te na 5,8 porciento na januari 2023, compara cu 5,5 porciento na december 2022. E presion inflacionario tawata debi na e nivel eleva di prijs di petroleo riba mercadonan internacional y e aumento den prijs di awa y coriente desde augustus 2022. Ademas, Aruba a importa un gran parti di e aumentonan den prijs for di su partnernan comercial, particularmente Estados Unidos y Europa.
Mientrastanto, na januari 2023, inflacion basico (excluyendo cuminda y energia) a alcansa 2,5 porciento (december 2022: 1,6 porciento) si midi e final di respectivo luna contra e mes un luna di e aña anterior. Basa riba un promedio di e ultimo 12 lunanan, inflacion basico a yega na 2,3 porciento (december 2022: 2,2 porciento).
Likides excesivo na banconan comercial
E total di likides excesivo na e banconan comercial a baha di Afl. 819,7 miyon na december 2022 te na Afl. 690,3 miyon na januari 2023, continuando riba e tendencia di bahada observa durante 2022 (Grafico 3). Ademas, estimacion preliminario di e likides excesivo na februari 2023 a indica un caida adicional di Afl. 40,6 miyon compara cu januari 2023. Sinembargo, likides excesivo a permanece riba e nivel estima (+Afl. 401,6 miyon) cu e banconan comercial posibelmente ta desea di mantene pa motibonan di cautela.
