Ayera durante e reunion den parlamento tocante e ayudo financiero di Hulanda, minister di Finanzas y Asunto Economico, Xiomara Ruiz-Maduro a informa cu e cifranan a mustra cu tanto entrada di impuesto directo y indirecto ta bayendo hopi lihe atras.
Pa loke ta entrada impuesto directo den caha di gobierno pa medio di departamento di Belasting, ya caba ta mustra un caida di 26.3%. Y un 46.4% pa locual ta belasting indirecto. E caida aki a wordo refleha na luna di april ultimo relaciona cu e actividadnan cu a tuma luga un luna prome den maart.
Ya caba e cifranan preliminar di luna di mei ta mustra riba un reduccion cu ya a pasa 50%. Pero ainda e informacion aki no ta full completo, ya cu mester warda cierto cifra riba kico por a drenta caha di gobierno via banconan.
Tambe el a referi na impuesto relaciona cu importacion y accijns, cu na luna di april a mustra caba un caida di 62.3%. E ta haya cu e caida aki ta hopi mas halto di loke a wordo proyecta. E cifra aki ta refleha e caida drastico den importacion di alimento y otro sorto di productonan. Importacion mes en general a baha cu 45% na luna di april. Cuminda su importacion a baha cu 38% y otro productonan a baha cu 47%.
