Informacion di finanzas di gobierno pa kwartaal 1-2021 no ta conoci ainda; pa esey mester warda riba raportahe di e periodo ey, cu mester ta cla seis siman despues cu e periodo clausura, y cu ta bay pa CAft tambe. Dentro di poco por spera e cifranan ey. Sin embargo, Banco Central a publica caba nan cifranan te cu luna di maart 2021, den cual ta aparece tambe e datonan di entrada di gobierno pa e promer tres luna di e aña aki.

Nos a pone esakinan – pa cierto categoria di entrada – hunto cu e cifranan corespondiente na e mesun periodo di 2020, y e cifranan di ultimo tres luna di 2020. Pa haci un bon comparacion entre e diferente periodonan, ta importante tuma un par di aspecto na cuenta. Resultado di trimester 1-2020 ta influencia pa dos luna ‘normal na comienzo di aña, mientras 2021 a conoce tres luna completo den e pandemia. Esaki tin influencia riba entrada total y di impuesto total. Por observa cu promer kwartaal di e aña aki tin un entrada bastante mas abao cu ultimo tres luna di 2020, pero esaki ta pa un gran parti debi na entrada di winstbelasting den ultimo lunanan di aña2020 (Afl. 86 miyon), unda hopi compania a pidi posposicion di nan pago di winstbelasting cu normalmente mester ta entrega pa fin di luna di mei.

Descontando esey por mira tambe cu p.e. loonbelasting a keda bastante na nivel, aunke naturalmente menos cu e mesun periodo di 2020 (-23,8%), pero mas cu e ultimo kwartaal 2020. Mester tuma na cuenta si cu loonbelasting di december 2020 ta ser declara na januari 2021; esaki ta splica e aumento compara cu ultimo tres luna di 2020.

Algo similar nos por mira tambe den e caso di BBO/BAVP, cu pa e promer tres luna di 2021 ta mas halto cu ultimo periodo di 2020, debi na e pago di BBO/BAVP riba benta di december na januari di e aña aki. Compara cu e mesun periodo 1-2020 por mira un reduccion ainda di Afl. 15,9 miyon, cu ta -28,9% menos.

Impuesto di importacion (invoerrechten) na 2021 ta -27,2% compara cu e mesun tres luna di inicio di aña 2020. Por ultimo, impuesto riba cambio di divisa ta ainda na -38,3% compara cu e mesun periodo di 2021, loke tin su logica cu economia solamente parcialmente recupera ainda, loke ta resulta den menos compra di mercancia, cu tin su efecto tambe riba menos entrada di impuesto di importacion. En total un imagen cu por a anticipa, cu no ta mustra desviacion grandi den sentido positivo o negativo.