Ayera merdia na misa Santa Teresita durante entiero di Roshandrick y Rishandroh minister di Asuntonan Social Glenbert Croes (MEP) a expresa cu ‘autoridadnan tambe tin cu realisa cu algo tin cu cambia y tin cu haci cosnan di manera diferente’. Minister president Evelyn Wever-Croes (MEP) di su banda a hiba un discurso cortico pa publico den e misa.

 Esaki e mandatario a expresa despues di a entrega un plan di emergencia pa loke ta trata abuso di mucha. “Nos tin cu actua diferente pa Dios mediante bin un mehoracion pa siguridad y felicidad di nos comunidad. Di parti di gobierno nos ta haci tur cos den nos man, y loke nos no por nos ta haci toch pa scapa bida di nos yiunan.”

Manera nos a publica ayera e mandatario di Asuntonan Social a entrega un plan di emergencia cu ta integra tanto departamento di gobierno den cadena social, departamentonan cu ta cay bou otro ministerionan y tambe instancianan no gubernamental. “Nos ta bay trece un meldcode central pa casonan asina, hunto cu un meldplicht. No solamente esey si no cu ora bo meld bo ta bay wordo protegi y yuda tambe. Nos mester asumi e liderazgo den esaki.”

‘Nos grandinan tambe ta wordo neglisha’
‘Bo por agredi un hende di diferente forma’, e mandatario a bisa. Sr. Croes a expresa enfaticamente cu tampoco tin cuido adecua pa nos grandinan. Esaki segun e mandatario ta un tipo di agresion. “Nan no ta wordo atendi. E cos aki ta un crimen! Ora un bieu cu no por yuda su mes y bo no ta yud’e pa malo bo ta culpabel di un crimen. Algo lo pasa cu ne! Nos mester tin un nivel di consenshi mas halto.”

Meldpunt ta existi caba pero lo amplia esaki
E gobierno nobo kier bin cu un meldpunt central, pero pa casonan di abuso di mucha esaki ta existi caba den forma di Bureau Sostene Mi. Nos a puntra e mandatario e ora ey kico specificamente gobierno kiermen cu ora ta bisa cu lo bin un meldpunt central mientras esaki ta existi caba.

E mandatario di Asuntonan Social a expresa cu entre otro lo amplia e meldpunt pa medio di haci’e disponibel 24 ora pa dia. Apart di esaki lo conecta otro autoridadnan tambe na e red aki. “Mescos ora bo yama pa emergencia di candela of un accidente, esaki lo ta mescos.” Sinembargo sr. Croes a expresa cu e lo desea pa e detayenan wordo splica pa e profesionalnan den e sector aki. Sr. Croes a finalisa bisando cu mas cu tur cos ‘nos mester ta consciente como comunidad y como pais. Laga nos siña di e experiencianan doloroso aki y laga nos bisa nos mes cu nos no ta laga casonan asina ki tuma luga mas’.

Den un comunicado cu nos a haya di gobierno despues, nan a elabora riba e discurso cu a wordo hiba pa prome minister Evelyn Wever-Croes. “Prome minister a duna palabranan di encurasha y fortalesa na famia di e dos criaturanan aki. E premier un biaha mas a recorda tur esnan presente y esnan cu a sigui e entiero na television of via medionan social cu awor mas cu nunca nos mester uni como un comunidad pa e derecho di tin un bida digno, un bida sigur cu miho oportunidadnan yena cu amor y speransa. E derecho aki ta conta pa nos tur. Pa muchanan, pa hobennan, pa mayornan, pa nos grandinan. Aruba su famianan, su pueblo tin derecho pa biba den libertad, den pas, cu amor y respet pa bida di otro na prome lugar.”

E mandatario a conclui su discurso cortico cua segun e relato el a considera e discurso di mas dificil cu el a yega di duna, gradiciendo tur esnan presente y e comunidad di Aruba cu a uni cu e famia den e yamada di gobierno pa tene e dia aki como un dia di luto pa convivi cu e famia den e dolor grandi aki.