E palabra contribucion propio pa atencion medico semper tabata uno politicamente dificil pa discuti. Pero e ta mustra cu si bay de acuerdo cu condicionnan pa ricibi ayudo di likides pa Aruba, lo mester realisa cu e tempo di djis bay dokter y laga AZV paga tur cos lo bay ta tras di lomba.
Esey ta den e plannan di e Entidad di Reforma Caribense cu ta drenta na vigor unabes cu acepta e condicionnan di Hulanda, cu kier mira cu specialistanan cu ta brinda servicio na AZV, drenta den un relacion di trabou cu dr. Horacio Oduber Hospital. Pues ya lo no por tin oficinanan priva di specialista cu ta duna servicio na cliente di AZV. Lo revisa e manera con ta calcula costo, hunto cu instancianan di seguro y e autoridad di cuido di Hulanda. Tambe lo revisa e pakete total cu AZV ta cubri y manera menciona, introduccion di contribucion propio.
E Entidad ta kere cu hospitalnan di e paisnan den Reino lo mester traha hunto pa bira mas eficiente y coopera cu otro pa baha gasto. Cada uno por specialisa riba cierto tereno y asina particularmente optimalisa cuido. E intencion ta pa baha gastonan di trato medico den exterior.
Aruba lo por sigui conta cu sosten medico di Hulanda durante e pandemia di Covid-19. E Lo sigui ehecuta consehonan di e Team di Maneho di RIVM pa loke ta e pandemia di Covid-19, cu ta entre otro e mantencion di capacidad di Intensive Care, reforsa servicionan di salud publico y mantene suficiente material di proteccion, ademas di test.
Enseñansa
Un grupo di experto di tur cuater pais lo reevalua henter e structura di enseñansa, tanto e aspecto publico como priva. Asina lo studia e calidad di enseñansa, metodo y medio di les, con ta conecta e sectornan di enseñansa y mercado laboral, y busca forma pa mehoracion di calidad, door di un supervision mas efectivo di parti di inspeccion.
