E prome reunion publico relaciona cu tratamento di presupuesto 2021 a cuminsa cu un sabor amargo. Tur e parlamentarionan den sala a firma e lista di presencia. Mientras algun parlamentario tabata pafo atendiendo cu un grupo di werksters preocupa pa nan futuro, NINGUN parlamentario a haya chens pa pone nan nomber pa hiba palabra. Na mes momento Presidente di Parlamento sr. Edgard Vrolijk di un rato pa otro a cera e posibilidad pa hiba palabra. Den poco palabra e reunion di mas importante di PAIS ARUBA lo mester a keda aproba sin cu niun parlamentario tabatin e necesidad di debati riba e topico? E reunion a keda posponi un rato, pa asina cada parlamentario pasa den e documento cu a keda entrega na nan door di Minister di Finansas y Economia, sra. Xiomara Maduro.
Despues di e receso e lider di fraccion di MAS y di RAIZ a pidi un punto di ordo, haciendo e peticion pa e Presidente reconsidera su decision. Parlamentario sra. Aquanette Gunn tabata e prome cu a lanta skirbi nomber y logicamente cu mayoria di su preguntanan den prome y di dos tanda a keda haci na Minister di Enseñansa, sr. Rudy Lampe, mirando cu e ta bin for di mundo di enseñansa.
Varios di e contestacion cu sra. Gunn a ricibi for di e mandatario no ta cuadra cu e documentonan cu e parlamentario ta dispone di dje y tampoco e Minister a sa di responde su preguntanan specificamente. Esaki a conduci cu sra Gunn lo keda pendiente pa ken lo bira e siguiente Minister di Enseñansa. Den tur sentido di palabra Enseñansa ta rekeri di atencion urgente.
Pa yega na un constelacion di parlamento di nivel y madura segun miembro di parlamento Gunn, ta depende di hopi factor. Pa e menciona algun; tin cu cuminsa pa trata otro cu respet. Si bo kier cuestiona un colega, hacie a base di su funcionamento y no riba algo personal. Cumpli cu bo obligacion y deber na tur ora y tur momento.
Finalmente Parlamentario Aguanette Gunn a subraya cu nos no por papia di un parlamento madura sin cu cada integrante haci un autoreflexion y fiha puntonan concreto di mehoracion pa su mes.
