Enseñanza mester… Haci mas cu menos…

Aunke no tin presupuesto 2022 presenta e aña aki mas, detayenan di loke mester sucede na 2022 ta bira conoci. Asina ministro encarga cu enseñanza a duna di conoce den rueda di prensa antayera, cu su ministerio lo mester corta como Afl 11 miyon riba nan gastonan pa 2022, como contribucion na e meta di yega na un presupuesto balanza pa otro aña. Esaki ta e deseo tambe di e colegio di supervision financiero CAft, cu a indica bon cla recientemente cu nan recomendacion ta pa tin un presupuesto balanza na 2022, y no warda cu esaki te na 2023. Despues di tende algun murmuracion tocante e conseho di CAft, cu ta dirigi na Conseho di Ministro di Reino, e participacion di e ministro encarga cu enseñanza ta parce un señal cu gobierno ta trahando toch riba un presupuesto cu por carga aprobacion di CAft y Gobierno di Reino.

Esey ta parce nos logico tambe, pasobra a pesar cu regularmente ta cay e palabra ‘autonomia’, e realidad di awe ta cu nos tin seis aña caba bao di un regimen di supervision financiero, cu ta controla nos presupuesto promer cu e sali, y despues cu esaki pasa parlamento. Si parlamento cambia algo cu no ta cuadra cu e pensamento di e organismo consehero,esaki por resulta den un ‘aanwijzing’ unda cu gobierno di Reino ta notifica gobierno di Aruba cu ta necesario cumpli cu loke Hulanda kier mira cambia den e presupuesto. Pues por bisa cu nos ta den un ‘straight jacket’ di Reino, di cual por lo pronto no tin salida. Y probablemente lo tin mas anuncio manera esun haci aki, di otro ministerionan.

Pero, bolbiendo na e tereno di enseñanza, 11 miyon florin ta cay hopi duro. E motibo ta cu un porcentahe halto, un 85% di presupuesto ta bay na gasto di personal. Banda di 13-14% na gasto di explotacion no ta resta mucho pa inversion. Y como ta dificil reduci personal sin corta den e oferta total di enseñanza, ta logico cu e recorte presupuestario ta cay den e categoria di inversion. Y esaki ta haci dolor pasobra e ta pone un limite fuerte riba loke por logra den innovacion y mehoracion di enseñanza. Y esaki na su turno ta causa cu enseñanza ta keda pega entre necesidad di innovaciony e imposibilidad di ehecuta, pasobra practicamente tur cos cu lo desea di haci ta costa placa, y continua traha manera cu e situacion ta actualmente tampoco ta un opcion. Y no ta trata di un solo problema, sino di varios asunto bastante compleho y na tur nivel di enseñanza. Sin duda algun esaki ta trece cune cu lo mester pone prioridad, lagando otro asunto cu tambe ta prioridad un banda. Pa cuminza lo mester defini cual nivel di enseñanza lo ta promer prioridad. Esaki, aparte di kico e mandatario o departamentonan concerni lo opina, pa nos esey ta educacion primario. E motibo principal ta cu si no ta haci un esfuerzo grandi pa mehora calidad na e nivel aki, tempran den e proceso, e problemanan di calidad inferior ta keda filtra den e siguiente formanan di enseñanza, unda e posibilidadnan pa logra mehora e deficiencianan di educacion basico ta minimo, y ta keda influencia negativamente e resultadonan di e formanan di educacion secundario y mas halto.

Un di e temanan cu ta sclama pa solucion ta e problema di idioma. Ta dificil imagina un mehoracion si den enseñanza primario cada ken por dicidi pa nan mes cuanto di ki idioma nan ta aplica den nan klas, salvo algun scol cu conoce un disciplina fuerte pa loke ta e idioma di instruccion. Banda di esaki nos tin e problema – grandi – di cantidad insuficiente di studiante cu ta drenta y ta gradua anualmente na nos instituto pedagogico. Ademas tin e problema di nan calidad como maestro, reconoci pa algun conocedor di e materia, pero unda nos no ta tende ni mira accion pa mehora. Y banda di esaki,recluta mas maestro di por ehemplo Hulanda ta birando mas dificil, mirando e escasez di maestro na e pais ey mes. Nos mester bay haci manera mas di 60aña atras, tempo cu nos a importa un impresionante cantidad di maestro di Surinam?Tin otro tendencia contrario si, cu ta na fabor di baha gasto, y eseyta e cantidad di mucha menos cu tin actualmente den kleuter- y basisonderwijs. Segun cifra di e propio ministerio,entre aña escolar 2015-2016 y 2020-2021 por mira un reduccion di 82 mucha menos na kleuter priva y 46 mas na kleuter publico; mientras cu den enseñanza basico tin 613 mucha menos actualmente, di cual gran parti (543) ta di enseñanza priva, y 70 di scolnan publico. E cifranan di reduccion di nacimento na Aruba di ultimo decada ta sugeri un reduccion mas fuerte den edad di 0-9 aña, pero lo mester tene cuenta cu e muchanan cu ta yega di exterior, cu ta ocupa parti di e capacidad disponible. Di esey nos no tin cifra.Finalmente, mester bisa cu durante e ultimo añanan ya no tabatin tanto fondo pa inversion. Na 2018 tabatin algo mas cu 2 miyon florin disponible, na 2019 algo mas di 660.000 y aña pasa esey a keda reduci na alrededor di 200.000 florin (te cu october 2020). Si no por recuri na fondo externo den forma di proyecto, ta dificil imagina algun avance.