Enseñanza den problema… Si no para crisis di salud…

E crisis actual cu nos ta aden no ta un problema riba su mes. E ta crea problema adicional, tanto pa economia como pa enseñanza. Y riba nan turno esakinan tambe ta relaciona cu otro, por ehemplo pasobra a retraso cu tin den reapertura den enseñanza tin su efecto riba economia, pasobra e cantidad grandi di mayor cu mester traha, mester tambe atende e situacion na cas, unda lo mester percura pa supervision y cuido pa e yiunan cu no por bay scol.

Hasta pa e mayornan cu no tin problema financiero y por paga e ayudo cu nan mester, e asunto no ta facil pasobra e personanan pa tuma e empleo temporal aki pa gran parti no ta disponible. E preocupacion pa loke ta tuma lugar na cas mientras nan ta trahando ta keda atencion di trabao, haciendo nan menos efectivo. Pero en todo caso esey ta un daño menor compara cu e daño grandi mes, cu segun nos ta e atraso grandi cu a tuma lugar caba den henter enseñanza. Y cu ainda no a termina, pasobra mester a pospone reapertura di scolnan te dia 3 di september.

Sin embargo, e problema cu ta surgiendo ta cu e fecha ey tambe por ta prematuro. Esey nos ta deduci di e cifranan di e crisis di Covid-19 manera nos ta mira nan nos dilanti actualmente. Un resumen cortico. Nos a haya un rebrote despues di e promer etapa cu a tuma proporcion cu nos no a anticipa. Desde inicio di augustus unda tabatin 121 caso comproba di coronavirus, y despues di algo mas di tres siman, 23 di augustus, nos ta na 1568 caso comproba. Esey ta un aumento di casi 1.200%. Poco lugar lo a conoce un aumento asina spectacular, pero mas importante ta con nos ta bay sali di e abismo aki. Y ta aki cu nos no ta mira tanto progreso ainda. Nos por observa por ehemplo cu den e promer siman di e rebrote tabatin un promedio di 55 caso nobo pa dia. E siman despues esaki a bira un promedio di 77 caso nobo pa dia. E tercer siman di e luna aki nos tin 69 caso nobo pa dia, un mehoracion relativo compara cu e siman anterior, pero tambe un indicacion cu nos ta leu ainda di domina e crisis aki. E pregunta grandi ta si den e ultimo siman aki nos ta progresa asina rapido, cu nos por mantene e fecha di 3 di september. Nos por a tuma nota tambe di e preocupacion di sindicato di maestro cu ta boga pa cautela den evaluacion di un posible reapertura. Sin embargo, ta imaginable cu nos por yega fin di september sin cu por habri scol na un manera responsable.

Di e banda ey ta sano huicio so lo yuda di parti di esnan cu mester tuma decision.Ta di spera si cu e toma di decision ey no bay manera e bochorno alrededor di e debate si nos compania di telecomunicacion lo ta prepara si of no pa un yegada masal di tur scol riba internet pa pasa pa enseñanza completo online. E opinion cu e team di crisis a adopta encuanto e posibilidad di maneha enseñanza online tabata mes leu di realidad cu esun di e ministro di enseñanza cu algun tempo pasa tabata kier pa nos kere cu Aruba ta cla pa bay full online cu enseñanza. Asina dificil ta pa opina di manera balansa, na e nivel aki? Ademas cu di mes nos enseñanza no ta prepara pa bay full online, banda di e pregunta si lo ta deseable pa pasa pa enseñanza full online, sigur pa e muchanan di menos edad. Scol ta un ambiente di educacion importante cu no mester subestima. Y ta bin acerca e argumento ya menciona cu scol ta importante pa e mayornan por traha. E problema adicional di bay online ta trece dilanti atrobe e situacion unda tin scolnan cu no ta na nivel pa loke ta nan recursonan, combina cu e realidad cu nan ta atende mucha cu ta bin di e famianan menos afortuna, cu pa un gran parti no tin acceso na internet. Pakico nos no ta tende nada di con ta bay haci pa soluciona e problemanan aki? Si nos trata di ignora esakinan, nos no ta haci nada otro cu aumenta mas ainda e desbentahanan pa e muchanan aki. Y ta bin acerca cu den e situacion di crisis aki nos no tin e recursonan financiero pa haci loke ta necesario pa remedia e situacion. Si nos contempla e problema di e banda ey, no ta dificil pa conclui cu e consecuencianan di e crisis di salud aki riba enseñanza por tuma varios aña pa remedia. Anto esey riba e desastre cu enseñanza tabata caba promer cu e crisis a bin ‘corona obra’, pa usa un expresion di excelente aplicacion aki. Di tur manera, e proximo aña sigur, y te ora bin un solucion efectivo den forma di un vacuna, nos lo mester siña lidia cu un enseñanza cu lo ta parcialmente den klas y parcialmente desde distancia, cu tur e problemanan di esey. Loke ta importante ta pa nos keda libra di opinion exagera cu no ta yuda pa busca un caminda realistico den esaki.