Enseñansa secundario Argentino den crisis mayor

Den caida liber y acumulando fracaso, e scol secundario Argentino ta duna indicacion cu ta papia di un crisis terminal. Casi cinco di cada dies alumno cu ta cuminsa, no ta logra caba scol na tempo. Como 390.000 alumno – 10% – den algun momento di aña ta dicidi di cambia klas pa caya. Pa e grado halto di repiticion, casi cuatro di cada dies alumno awendia tin “sobre-edad”.

Y pa esnan cu si ta termina bon, tampoco tin bon noticia: den e pruebanan di siña, 40% no a alcansa e nivel basico di matematica y tambe tin prestacion abao den idioma. Ta calcula cu den e proximo añanan, mas di mita di e trabaonan actual den economia ta desaparece y lo crea nobo, cu ta exigi un combinacion nobo di conocemento y capacidad. E scol secundario ta ofrece esey na mita di e muchanan cu awe ta completa e scol ey? Pakico tin tanto mucha cu ta “huy” di scol secundario?

“Tin un consenso halto cu e nivel medio mester un cambio urgentemente. E alumnonan no ta entusiasma, nan ta fada. Den dies aña tabatin como 70% mas inversion den enseñansa secundario: a pasa di 1.1 % di PIB na 2005 pa 1.8 % na 2015. Pero no  a logra para e salida prematuro y  e formacion  pober di esnan cu a gradua,” nan ta bisa na Ministerio di Educacion.

Tur e asuntonan aki ta ser analisa pa e 24 ministerionan di educacion di e pais cu ta bin ta cushina, riba un candela bastante abao, un reforma drastico di scol secundario, cu lo cuminsa implementa e proximo aña den algun scol. E lineanan general a keda presenta na presidente Macri siman pasa y posiblemente lo trata nan e siman aki den reunion di e Conseho Federal di Educacion na Córdoba.

Si ta sigui cu e reforma aki, na 2019 tur provincia ya mester tin nan plan di implementacion. E cambionan lo obliga e ekiponan docente di cada colegio pa presenta un proyecto educativo cu lo duna e scol sentido, y di e modo aki, lo motiva nan studiantenan. Cada scol, ademas, lo mester planifica e  aña specificando cual lo ta e indicadornan di mehoracion cu ta propone, di acuerdo cu e datonan y e informe cu e prueba ‘Aprender’ ta entrega. No lo tin mas “profesores taxi” cu ta traha algun ora so den hopi scol y cu tin poco contacto cu nan alumnonan. Na nan lugar, e docentenan lo ser designa cu trabao completo na un solo scol, y asina ta spera cu nan tin mas contacto cu  e alumnonan. Y lo cambia tambe e forma di acredita e conocimentonan: tin pensa di flexibilisa e repiticion clasico di aña, un sistema cu a demostra di no tin exito y ta provoca cu hopi alumno, especialmente esnan di e sectornan mas vulnerable, ta kita for di scol.

E cambionan ta implica un reformulacion di e contenido curricular di e scol secundario. Ta pensa den menos materia, cu ta garantisa e conocemento prioritario y e capacidadnan fundamental cu ta “prepara e hobennan pa e desaroyo personal, social, cultural, laboral y productivo.”

No tur hende ta asina convenci cu e proyecto ta bay ta un exito. Un critico ta bisa: ““E propuesta curricular nobo ta un gran paso dilanti, pero tin mester di hopi traduccion practico, cu ta lo mas dificil den tur proceso di renovacion curricular. Ta clave pa logra potencia e areanan di desaroyo  curricular pa crea traduccionnan viable na escala masivo di e practica di enseñansa.”