Un aña pasa, minister di Labor, Energia y Integracion, Glenbert Croes a cuminsa hunto cu minister di Enseñansa, Endy Croes cu un idea pa trece cursonan di Enseñansa pa Empleo na San Nicolas. Siman pasa, minister di Enseñansa a anuncia cu EPE SN ta bay cuminsa cu un programa piloto, ofreciendo tres curso nobo na San Nicolas.
Minister Croes a elogia e cooperacion di director Mathilda y juffrow Helder di EPB San Nicolas den e proyecto. Cu ayudo di docentenan di ofishi di EPB SN, a diseña curso pa e sector tecnico. Awo ta anuncia cu Enseñansa pa Empleo a bira parti di famia EPB San Nicolas.
Segun un comunicado di gobierno, e cursonan di Enseñansa pa Empleo San Nicolas ta diseña pa esnan cu tin curashi, gusta trabaonan manual y ta dispuesto pa siña e parti basico di Welder, Electra of Handyman. No ta importa si bo persona kier amplia bo conocemento of crea un fundeshi fuerte of simplemente kier haya mas conocemento practico.
Manera menciona caba lo tin 3 curso cu ta bay cuminsa den luna di september. Tur 3 curso tin cupo limita pa asina por garantisa e siguridad durante e cursonan mirando cu ta traha cu ekipo, mashin, herment semi- pro y full profesional y tambe diferente materialnan cu ta usa pa instalacionnan di coriente; welder y tambe pa trabaonan di handyman.
E 3 curso cu lo cuminsa pa awo ta:
Electricien Basico
Welderdo A
Handyman Nivel 1
Cursonan ta start 10 di September. Cada curso tin lugar pa 10 persona pa un duracion di 13 siman.
Tur e 3 cursonan aki lo tuma lugar den e edificio di EPB SN, situa na Caya Jose Geerman 77.
Registracion ta bai via nos website:
Click riba e opcion cu ta bisa :”Curso”
Y click riba e curso di bo preferencia.
Ora inscripcion ta wordo completa coleganan di EPE lo tuma contacto cu bo persona pa duna instruccion di pago.
Manera e pago ta efectua y prueba a wordo manda pa nos, e oro ey bo cupo ta sigura.
Corda cu tin 10 cupo so awo pa cada un di e cursonan aki.
Pa finalisa mi kier gradici un biaha mas Minister Glenbert Croes pa su vision y apoyo pa habri Enseñansa pa Empleo San Nicolas.
Tur nos stakeholders cu a yuda sponsor tur material necesario: WEB, Elmar, RDA, Utilities,
Y Director Mathilda; masha danki di curason pa bo sosten, apoyo y guia, hunto nos a logra pa ofrece cursonan di ofishi na San Nicolas!
