Enseñansa Multidisciplinario: ‘Studia na OGM ta un bon escogencia pa esnan cu ta sigur di nan meta, como esnan cu no’

ORANJESTAD— “Mi a scoge e trayectoria di OGM pasobra mi ta kere e enfoke multidisciplinario di e estudio ta valioso. Pensando riba mi carera desea di consehero di impuesto mi a scoge OGM pasobra bo ta haya mas cu simplemente ley, cual ta e area cu mi kier bay den dje, bo ta siña con organisacionnan mes ta traha.” Asina Akeem Erasmus studiante di OGM ta conta Bon Dia Aruba.

E trayectoria di Bachelor Organization Governance and Management (OGM) na Universidad di Aruba su Faculty of Arts and Science ta creciendo cada aña mirando e enfoke multidisciplinario cu ta anda cune den e estudio. Den combersacion cu varios studiante, esaki ta un aspecto cu nan ta haya ta unico.

Durante e prome aña di e estudio studiantenan ta haya un introduccion na varios curso general cu ta e base di henter e carera academico di 4 aña. Ta inclui skirbimento y lesamento di articulonan academico, pensamento critico y metodologia di investigacion. Ademas di esaki, e curiculo principal di e estudio ta encera, manera e nomber OGM ta sugeri, organisacion, gobernacion y maneho.

E aspecto amplio di e estudio ta basa riba e varios perspectiva cu studiantenan ta siña pa tin riba nivel di organisacionnan. Con nan ta relaciona cu otro? Con un organisacion ta structura? Con nan ta resolve problema? Esaki ta envolve varios organisacion tambe, manera den sector di salud publico, con dokternan, AZV y demas organisacionnan ta anda cu otro.

‘Maske mi kier specialisa den ley, mi a scoge un estudio cu perspectiva mas amplio’

Pa Erasmus, kende ta den su di dos aña y lo kier bira un consehero riba tereno di impuesto, e enfoke amplio di e estudio a atrae su persona maske su area di specialisacion lo ta specificamente den ley. “Mi a prefera OGM mas compara cu e facultad di derecho pasobra cu OGM mi por bira un consehero di impuesto, mientras mi ta haya conocemento di otro area cu ta duna mi un perspectiva mas amplio manera psicologia, sociologia y, claro, ley.”

Su plan ta pa haya un perspectiva mas amplio durante su programa di Bachelor pa despues por specialisa den ley di impuesto como su Masters. ‘Di e manera aki mi ta kere mi ta yuda mi mesun conocemento den varios area’, Erasmus a splica.

“OGM ta algo hopi bon pa un persona cu no sa specificamente loke e kier haci pasobra e ta hopi general y amplio, pero pa esnan cu sa loke nan kier, e ta un bon escogencia tambe pa sigui e programa aki y pesey ami ta siguiendo e.”

Fuera di specialisacion den area legal, studiantenan por scoge pa specialisa den areanan manera Human Resource Management, cual ta mustra cu bo no mester tin interes den traha pa sector publico si bo ta prefera bay mas den sector priva. Den combersacion cu docente Mieke de Droog, e ta splica cu e direccion den cual cada studiante ta bay, ta varia hopi mes mirando cu tin studiante cu ta dicidi di traha den sector publico, cierto ta bay den sector priva, y tin tambe un cu ta dicidi di cuminsa nan propio negoshi.

Esaki por mira bek den OGM su studiantenan: Marc Farro, kende a caba su estudio cu specialisacion den Human Resource Management, Nurianne Helder kende a bay den direccion di maneho di salud y actual studiante Julian Arango, a conta Bon Dia Aruba cu kier lanta nan mesun negoshi a base di sostenibilidad.

Farro a splica cu, como ex alumno di OGM, ‘cada studiante su interes individual lo bay dicta den kico nan ta bay specialisa. E ta casi manera bo ta crea bo mesun curiculo’. Pa haya mas informacion tocante e estudio por bay riba OGM su Facebook: University of Aruba: (OGM) Organization, Governance and Management (FAS) of riba nan website http://www.ua.aw/faculty-of-arts-and-science/ogm/.