Pa via di pandemia Covid-19 y di diferente retonan cu area di Enseñansa ta bin enfrentando for di algun tempo, algun maestronan Arubiano a cuminsa tuma e decision di bay biba y traha na otro pais buscando un miho calidad di bida.

Asina a señala e presidente di Sindicato di Maestro di Aruba Josephine Albertus durante un entrevista na Bon Dia Aruba unda cu el a splica cu pa via di situacionnan anterior, Covid-19, cortamento di salario, entre otro, hopi maestronan a dicidi di bay traha otro caminda.

Esey a causa cu nan ta hayando falta di maestronan, pero loke Albertus a sigura ta cu nan tin pensionado cu kier sigui traha na scol y nan tambe tabata haci esey pero door di e beleid cu minister anterior di Enseñansa Armando Rudy Lampe “cu el a saca for di lachi, el a buta cu el a perhudica e veld”, el a bisa.

Door cu e persona ta pensionado nan tin hopi añanan cu nan a traha y nan tin hopi experiencia unda cu nan por yuda, por ehemplo, awor tin un klas cu no por haya les y tin un pensionado na cas cu lo por duna e les, pa esey el a comenta cu “mirando e situacion deplorabel unda nos ta y nos kier purba den tur sorto di sentido pa tene enseñansa riba un nivel, ban wak kico por wordo haci pa trece e pensionadonan back den e veld pasobra asina aki enseñansa lo bira mas y mas pio”, Albertus a indica.

Instructornan di landamento a tene reunion cu minister Endy Croes

Manera ta conoci na luna di juni cu tabata final di aña escolar, e contractnan di e instructornan di landamento di scol a wordo cambia pa un Overeenkomst van Opdracht (OVO). Esaki segun minister Croes tabatin como consecuencia cu e instructornan ta perde tur nan derechonan manera por ehempel ‘toelage’ conforme nan contractnan prome.

Pa e motibo aki, minister Croes a pidi Departamento di Recurso Humano (DRH) dia 28 di september ultimo pa un conseho huridico y tambe un pronto solucion pa e situacion aki.

Conforme conseho di DRH, nan a splica cu ta consehabel pa laga e instructornan di landamento resorta bao di DPS unda cu nan tabata, en bes di manda nan Ibisa y a percura pa tin presupuesto pa nan. Segun, minister Croes a papia cu DRH pa por acelera esaki pa final di luna di october nan por cuminsa cobra di acuerdo cu contract normal cu nan tabata conoce.

Pa cu esaki, Albertus a señala cu diamars ultimo algun instructor di landamento hunto cu su persona a tene un reunion cu minister Croes nan unda nan a trece dilanti cierto preocupacion y incertidumbre pa nan por haya claridad riba nan situacion por ehemplo ora e ministerieel besluit di OVO a wordo treck in y nan no tabata sa ainda con esey lo sigui.

Nan a haya sa tambe cu OVO a wordo kita y nan a bay back den nan contract cu instructornan di landamento tabatin “pero ainda nos no a yega na unda nos kier yega” pero esaki ta algo si miho cu OVO manera Albertus a comenta pa motibo cu OVO a perhudica nan.

Loke minister a splica pa nan diamars ultimo ta cu DRH conhuntamente cu Directie Onderwijs y un persona di minister su bureau, ta bay percura pa bini cu un solucion duradero pa nan, no algo cu lo yega hopi lihe pero nan por bay na un contract di cinco aña of un aña.

For di awor nan un periodo di un aña pa traha y drecha y situacion manera Albertus a sigura, pero nan ta trahando riba dje y den contacto cu minister Croes pa nan sa kico ta pasando pa motibo cu e minister anterior nan no tabata haya informacion, segun Albertus a enfatisa.