Den combersacion cu diferente hende cu ta traha den enseñansa y cu ainda tin speransa, semper ta bisa cu ta mira avance (chikito). Esey por ta bon noticia, pasobra di mes nos no ta kere cu ta drecha enseñansa cu pasonan gigantesco. Asina tambe nos por mira e anuncio di nos ministro encarga cu Enseñansa tocante e introduccion di e ‘Nationale Eindtoets’ ( Prueba Final Nacional) pa matematica pa klas 6 di tur scol basico. E ta un bon inicio pero falta hopi mas. Pero mester ta contento cu a tuma iniciativa pa cuminsa cana e caminda cu por hiba nos na mehoracion berdadero. No falta solamente e otro partinan pa e prueba nacional na final di scol basico keda completa, pero falta tambe e trayecto prome cu yega na e di seis aña di scol. Aki tin hopi di drecha y si no drecha den e fasenan anterior, e resultado na aña seis lo no mehora. Tin proposicion conoci pa introduci test na diferente momento, variando di cada pasa un aña te na un pa cada aña mes. Mirando gastonan envolvi lo ta bon pa en todo caso cuminsa cu test cada dos aña, por ehemplo, pa despues eventualmente avansa pa cubri tur aña. Asina so por preveni e situacion actual, unda na final di aña seis ta bin ripara cu un mucha tin nivel aña tres of cuatro pa idioma of matematica, ora cu ta hopi laat caba pa coregi algo. Lamentablemente no ta trata di algun caso incidental, sino di cos cu ta pasa regularmente, segun fuentenan den enseñansa.
Naturalmente nos ta papiando awor solamente di mehora e instrumentonan di midi prestacion escolar. Ainda esey no a mishi cu e problemanan mes cu ta afecta e prestacion di nos muchanan. Pero si nos no cuminsa establece kico nos kier pa e muchanan tin na conocemento na final di cada tipo di scol, nos no por guianan pa yega na esey. Pues nos ta mira dos tereno importante nos dilanti: caba di desaroya e instrumentonan di control y midimento y traha riba e obstaculonan cu ta stroba nos enseñansa di produci alumno cu e conocemento desea na final di e trayecto.
Na 2011 un comision mixto di Dialogo Social, a entrega un rapport cu tabatin como intencion explora e puntonan di mayor preocupacion den enseñansa. E rapport a resumi dies punto importante, cu merece atencion inmediato y prioritario. Un di nan ta e necesidad pa yega na un sistema di control di calidad y rendimento continuo pa tur forma di enseñansa. Nos por considera e prueba nacional aki como un inicio di esey.
E rapport ta haci tambe distincion entre control interno y externo di calidad. Ta constata cu mas bien e control interno a keda existi, y ta faltando, no den tur caso, e control externo cu mester evita fayonan den e sistema ora ‘e scol mes ta controla su mes’. Riba su mes e no ta algo di otro mundo; tur caminda nos por mira cu ora no tin supervision externo, esun interno ta bira demasiado relaha y e sistema ta faya. Hopi biaha ta haya resistencia contra control externo, cu e argumento “cu nos mes por”. Esaki no necesariamente ta berdad y supervision externo tin su balor. Nos no por sigui den un situacion unda cada ken ta test su mes y por lo tanto un prueba nacional pa tur alumno di scol (basico) ta importante.
Manera bisa, e mehoracion aki lo mester bay man den man cu mehoracion riba otro aspecto, ya cu esun aki ta toca solamente e control di calidad, y no e proceso mes. Aki nos ta papia di mehoracion di maneho di e institutonan di enseñansa gubernamental, di directivanan di fundacion cu ta dirigi scol, y e maneho diario di e scolnan mes. Banda di esaki nos ta pega cu un cantidad di otro tema: integracion di mucha di exterior, sea legal o ilegal; falta di integracion di digitalisacion den enseñansa y cambio corespondiente den e metodonan di duna les; falta di medionan tradicional manera buki, posibilidad pa recapacitacion di nos maestronan, etc. Pa no papia mes di falta general di medio financiero y falta di instalacion adecua pa duna les.
Un di e otro aspectonan cu ta keda bin dilanti ta e problema grandi di idioma na scol basico. E no ta tanto tocante e debate di cual idioma mester tin preferencia. E ta bay tocante e hecho cu nos tin un situacion unda no por garantisa dominio satisfactorio den ningun idioma. E exigencia di duna les na Hulandes den esey di mes ta keda un deseo teoretico no cumpli.
Hopi biaha ta surgi discusion riba e famoso 6% di nos GDP cu nos lo mester dedica na enseñansa. Pero e limite aki ta un minimo, y no ta pa determina kico bo mester gasta. Den e situacion cu Aruba ta awor, talbes nos mester inverti hopi mas, sin wak si e ta cuadra cu e limite minimo. Importante ta na kico ta gasta y con e ta beneficia metanan cu nos tin.
