Bala di yerba, conoci como ‘tumbleweeds’ (amaranten) por mustra suave for di distancia, pero si un dal bo auto, bo lo ripara mesora cu nan ta yena cu sumpiña y palo. Cambio climatico ta alimentando e monsternan aki, cual definitivamente no ta e tumbleweeds di pasado.
Segun Los Angeles Times, na 2018 un cantidad enorme di tumbleweeds di mas di 1 meter di diametro a baha riba e puebo di Victorville, tapando porta, bentana, y formando hekinan cu sumpiña trapando hende den nan cas. Nan a forma blokinan di mas di 2m di haltura, alcansando bentana den segundo piso di casnan, y acumulando den cura.
Ta trata di un especie nobo cu awo ta floreciendo na Merca, Salsola ryanni, un hibrido cu ta crece mas grandi cu su matanan mayor. E por alcansa 2m di haltura, pues no ta manera e tumbleweeds chikito cu ta mira den peliculanan Western. Investigadonan na Universidad di California Riverside a investiga pakico e mata aki ta floreciendo, publicando un estudio den AoB Plants.
Salsola ryanii ta crea di dos especie di tumbleweed invasivo. Tin extra set di cromosoma di su mayornan, un estado conoci como ‘polypoidy’, algo comun den mata. Pa compara, casi tur humano tin unicamente un set di cromosoma di cada mayor.
Investigacion ta sugeri cu e tamaño y exito di e tumbleweeds ta pa motibo di polypoidy. Como un hibrido, e ta mas vigoroso cu su mayornan.
Profesor di genetica na UC Riverside, y co-autor di e estudio, Norman Ellstrand a describi Salsoa ryanni como ‘vies’ den un declaracion siman pasa. E mata, haya na California, ta mirando pa expande su teritorio.
“Ta un di e unico cos cu ainda ta berde den berano”, co-autor di e estudio, Shana Welles a bisa. “Nan por ta bon posiciona pa saca bentaha di yobida di berano si cambio climatico ta haci esaki mas prevalente.”
