Ennia no a publica su cifranan anual ainda

Ennia cu a sali den luz negativo e aña aki despues un rapport confidencial a lek den prensa Hulandes, te aworaki no a publica su cifranan financiero di 2015.

Segun fuente Amigoe tampoco nan ta contesta niun pregunta mas y asina miles di clientenan cu entre otro a spaar pa nan pensioen ta keda den scuridad riba e situacion na e compania di seguro.

Un poco prome cu Ennia mester a publica nan na juni, nan a pidi extension na Banco Central di Corsou y St. Maarten. Sinembargo despues e rapport confidencial di Banco Central na Hulanda a lek den prensa unda ta mustra cu e doño Hushang Ansary ta haci uzo di construccionnan financiero ilegal, e accountant di nan KMPG a pidi pa mas tempo y asina por haci extra control riba e cifranan di 2015.

Awor cu tin un poco mas cu dos luna prome cu e aña 2016 ta cera, tin duda cu e cifranan di 2015 ainda lo keda publica. Punto crucial e riesgo pe pensionnan. Ennia a bisa cu nan ta garantisa sinembargo no tin un partido externo te awor cu por confirma esaki tambe.