Ennia cu a sali den luz negativo e aña aki despues un rapport confidencial a lek den prensa Hulandes, a anuncia cu lo publica nan cifranan financiero februari 2017.

 

Un poco prome cu Ennia mester a publica nan na juni e aña aki, nan a pidi extension na Banco Central di Corsou y St. Maarten. Sinembargo despues e rapport confidencial di Banco Central na Hulanda a lek den prensa unda ta mustra cu e doño Hushang Ansary ta haci uzo di construccionnan financiero ilegal, e accountant di nan KMPG a pidi pa mas tempo y asina por haci extra control riba e cifranan di 2015.

 

Awor cu e aña 2016 ta cera, tin duda cu e cifranan di 2015 ainda lo keda publica. Punto crucial ta e riesgo pe pensioen nan di nan clientenan. Asina miles di clientenan cu entre otro a spaar pa nan pensioen ta keda den scuridad riba e situacion na e compania di seguro.

 

Pero ayera e compania di seguro a manda un comunicado indicando cu pa februari lo bin cu e cifranan. Manera nan indica esaki ta 6 luna mas laat cu normal cu Banco Central di Corsou y St. Maarten ta exigi esaki. Pero mester a tene cuenta cu reglanan nobo cu a pone cu Ennia mester a adapta su maneho di inversion.

“Esencia di e adaptacion necesario pa ENNIA ta cu bou di e reglamento nobo di 1 di september 2015 Ennia no por conta su dos inversionnan di mas grandi, cu hunto ta cubri mayoria di e cartera di inversion di Ennia, completamente como siguridad den su solvencia mas. Hunto cu e inversionnan aki Ennia Caribe Leven NV na 2014 tabatin un solvencia confortabel di 285%, casi tres biaha su obligacion. Adaptacion di e inversionnan actual, por ehempel door di benta of inverti di nobo, lo conduci na aumento automatico di e solvencia.”

Segun e compania pa acorda e cuenta anual di 2015, prome mester wak e balor di e inversionnan di nobo y tambe e ‘rapidez’ cu cua Ennia por y mester implementa e reglanan nobo di e Banco Central.

Nan ta splica tambe cu e dos inversionnan menciona den e rapport como dudoso, esta den e compania Mericano Stewart & Stevenson y e otro na Mullet Bay a keda balora door di expertonan independiente. Nan a balora esaki riba 505 miyon florin pa cu Stewart & Stevenson y esun di Mullet Bay riba 781 miyon florin.
E balor hunto aki ta mas cu a keda registra na 2014 cual tabata 1,271 biyon. Pero segun Ennia e Banco Central ta conta solamente un parti chikito di e inversion aki y asina nan solvencia ta keda mas abou. Mester bisa si cu e problema cu e inversion aki menciona den e rapport cu a lek ta, cu e inversionnan a wordo haci den compania sea interes di e doño Ansary. Pues cu otro palabra e ta uza e placa di e primanan di clientenan di Ennia pa inverti den su companianan sea interes. Locual ta algo considera no mucho etico y cu ta trece riesgonan cu ne.

Cambia di maneho

Sinembargo Ennia awor ta indica cu ta adapta su maneho di inversion pa asina cumpli cu e rekisitonan di solvencia di Banco Central. “Ennia ta trahando duro, pero tipo di accion manera esaki ta tuma tempo. Un benta lihe di inversion tin un efecto negativo riba e prijs y lo no ta na interes di aseguradonan. Segun e reglanan nobo mester inverti tambe na Antias, locual ta limita e posibilidadnan mas. Pa e motibo ey ta parce CBCS( Banco Central) y Ennia realistico pa tuma e tempo te cu fin di 2018 pa asina cumpli cu tur e reglanan nobo. Pa e cliente esaki no ta haci ningun diferencia”, asina e compania a declara.