Ennia ta den problema financiero grandi pa motibo cu su doño Hushang Ansary a saca alrededor di 570 miyon euro for di e compania di seguro. Esaki e fuente Hulandes Het Financieele Dagblad a publica a base di un rapport secreto di e Banco Central na Hulanda. E instancia aki a haci un investigacion aña pasa despues cu ya na 2011 nan a haya e prome señalnan cu Ansary tabata saca fondonan di Ennia pa financia otro companianan di dje.
Segun e rapport di e Banco Central e consecuencia ta cu tin miles y miles di asegurado cu tin seguronan cu probablemente no ta cubri sin cu nan ta na haltura di dje.
E motibo cu e investigacion a tarda tabata pasobra Banco Central di Hulanda no tabatin autoridad. Banco Central di Corsou y di St. Maarten mester a conduci e investigacion pero esaki no a sosode. Awor Banco Central di Hulanda ta cuestiona e integridad di e instancion ruman. Dado momento Banco Central di Hulanda mes a pidi autoridad pa investiga Ennia pa motibo cu tin asina un desastre den e Banco Central di Corsou y St. Maarten.
No ta cla dicon Banco Central di Aruba no ta wordo menciona den e caso aki. Ennia na Aruba ya a haya diferente yamada di su clientenan preocupa.
Update: Ennia a duna un declaracion cu nan ta lamenta e publicacion den e fuente Hulandes Financieel Dagblad. Nan ta bisa tambe cu e contenido di e rapport confidencial a wordo saca for di contexto y cu tin algun punto cu no ta cuadra.
