Desde 9 di januari Metabolic Foundation, e fundacion cu ta dirigi varios proyecto na Aruba, incluyendo Brenchie’s Lab y Plastic Beach Party, a habri un Makerspace adicional na Biblioteca Nacional su localidad na San Nicolas. E enfoke pa e localidad nobo, en bes di e localidad na playa cual ta enfoca riba mucha, ta riba hoben y adulto hoben. Coincidentalmente ta 4 aña desde cu Brenchie’s a habri su prome makerspace.

Esaki no ta kita cu claramente mucha tambe por haci uzo di e espacio nobo na San Nicolas, si no cu e tipo di mashinnan cu tin disponibel na San Nicolas ta ‘un poco mas avansa’. Asina Christie Mettes, coordinado di projectonan pa e fundacion, ta conta Bon Dia Aruba. Cu e mashinnan cu tin disponibel na e localidad nobo, hobennan, por ehempel esunnan cu ta bay EPB of EPI por ehempel, por bay traha riba diferente proyecto cu ta rekiri mashinnan manera e mashin di corta palo, of pa traha nan propio PCB, cual nan a siña haci na scol, pero unda mayoria famia no tin e mashinnan disponibel. Entre e mashinnan aki tin un draaibank, drill press y bench sander. Mettes a splica cu cualkier persona, no djis studiante of hoben, por haci uzo di e mashinnan aki na nan espacionan. “Hasta si bo kier traha algo pa cas, cual hopi biaha ta rekiri mashinnan cu no tur hende tin”.

‘Idea pa makerspace ta pa desaroya entrepeneurial spirit y digital literacy’.
Reflehando riba e iniciativa di Metabolic Foundation, hustamente ora a inaugura e makerspace aki na San Nicolas, ta coincidentalmente e fecha di 4 aña di existencia di e prome makerspace cu a habri, esta 9 di januari 2016. Desde cu a habri e prome makerspace, e vision bayendo dilanti, cual semper tabatey, ta pa curasha comunidad mes pa aporta solucionnan creativo, uzando tecnologia, pa problemanan cu ta existi na Aruba. “E espacio riba su mes ta nice, pero pa nos ta importante pa iniciativanan sali di e espacio. Plastic Beach Party tabata e prome iniciativa cu a sali di e makerspace. E idea e ora ey ta pa sigui desaroya cosnan cu ta trece balor agrega na Aruba. E reciclahe tabata e prome cos cu a sali di esey, y awo nos ta monitor medio ambiente tambe. Nos meta awo bayendo dilanti ta pa sigui traha riba esey, pasobra mi ta kere e ta importante. Nos gusta keha di loke ta e problemanan cu nos ta enfrentando, pero en bes di e bay asina, Brenchie’s por ta un recurso cu lo por desaroya solucionnan”.

Colaboracion pa resolve problemanan cu ya caba ta conoci.
Mettes a sigui conta cu pa yega na e meta aki, Brenchie’s Lab ni Metabolic Foundation ta wak su mes como esun cu mester trece e solucionnan semper, exclusivamente di nan banda. “E solucionnan no mester bin ful for di nos. Cualkier persona por drenta y bisa cu nos tin tal problema, pa cual nos por desaroya solucionnan. Kiermen Brenchie’s ta un espacio unda solucionnan por wordo desaroya pa problemanan cu nos ta experiencia na Aruba.”

E problema cu e ta wak, ta cu na Aruba parce cu hopi hende tin e conscientisacion riba varios problema, kiermen ta comprende e problemanan cu nos ta enfrentando. Sinembargo, mas leu cu esey, no tin mucho persona cu ta tumando accion of cu ta pensando con pa ataca e problemanan, Mettes ta haya.

Tata: ‘Bunita di Brenchie’s ta cu ta podera hoben pa crea’.
Un di e personanan cu ya caba tin 2 aña bishitando, mas o menos, ta elogia e fundacion pa e iniciativa aki. Durante e evento e tata a bin cu su famia, incluyendo su yiu jong, cual tin interes den programacion ya di un edad chikito. E yiu a conta Bon Dia cu e kier programa den Python y JavaScript. E tata a conta cu ‘ora mucha ta siña traha cu nan propio man y crea cosnan cu nan man, e ta algo magico’. “Awendia cosnan ta wordo cumpra den tienda y na momento cu algo chikito bay fout cune, ta tira e obheto afo. Kiermen cu mucha awendia no ta siña mas con pa repara nan propio cosnan. Al contrario cu ora mi tabata jong. Hopi paisnan a cay atras den esaki. Pero awo danki na makerspaces, den diferente pais manera Merca y paisnan Europeo, tin un movemento unda hende ta cuminsa traha cosnan cu nan mes por ta orguyoso di nan. Esey mi ta haya bunita, cu por medio di Brenchie’s e simiya aki ta cuminsa crece bek”.