E aña aki, Consultorio di asuntonan di adiccion (CAA) lo ta trahando hunto cu otro instancia pa acerca mas na comunidad, pa ofrece mas informacion y continua e trabou cu e consultorio ta eherciendo.

Arthur Comenencia, verpleegkundige di CAA a duna di conoce cu lo cuminsa den e Carrousel 2020 hunto cu diferente departamento concerni cu e problema di adiccion. “Mi ta kere, mirando esaki ta trahando hunto pa yega na pueblo, pa nan conoce kico nos trabou ta y kico nos ta bay bin cune pa asunto di videogaming.”

Nan ta enfoca e proximo lezing riba adiccion pa videogaming. Mayornan y cliente ta pidi pa duna informacion tocante videogaming, pa motibo cu ta ripara e problematica cu tin di mucha of adulto cu ta pasa oranan largo riba telefon, videogaming entre otro.

Entre muchanan por ripara cu scol ta bay atras, e comportamento ta bat atras, e parti di higiena ta bay atras, pues ‘e ta alarmante’. Sinembargo e ta bisa cu tin mayornan tambe ta pega den videogaming, particularmente wega riba telefon. “E mayornan ta preveni e mucha pero mayor tambe ta haci’e.”

Comenencia ta bisa cu den e begeleiding pa mucha, e mayor ta hunga un rol importante. “Na comienso e mayor mester haya e begeleiding, pues nos ta pidi e mayor bin hunto cu nan mucha.” Asina nan por wak e problema miho. Si CAA ta ripara cu e problema ta mas avansa, e ora nan ta bin cu psicologo of psikiatria cu ta traha cu nan departamento mes. E plan ta keda pa educa e mucha.

Segun Comenencia, un mayor semper ta hunga un rol. E mayor mester duna okay pa begeleid e mucha. Manera CAA tuma contact cu e mucha, nan ta tuma contact cu e mayor na e prome reunion, pa ‘kibra e ijs’.

Di e forma ey nan ta mira di biaha e situacion cu tin na cas, nan ta mira e enfoke di e mucha y mayor. E ta bisa cu nan tin caso real na Aruba di adiccion pa wega.

Wega manera ‘Grand Theft Auto’ y ‘Fortnite’, weganan cu ta supuestamente ta pa persona18 aña di edad bay ariba. Nan ta enfatisa cu e mayor mester ta consciente di controla den kico nan yiu ta hunga, ya cu ‘unabes tin acceso na internet, tin cu pone regla den cas’ y limita cuanto ora e mucha por haci uzo di internet.

Ta conoci cu e mesun mayornan na cas ta esunnan cu ta duna nan yiu videogame pa hunga, pa asina no molestia e mayor. E ta bisa cu mayoria no sa di lesnan inconsciente cu ta duna. Mayornan ta haci esey pa haci nan bida facil sin sa cu ta afecta e bida di nan yiu y cu e problema por bira grandi.

Nan ta spera si pa den futuro no pasa manera Merca, unda tin varios tiramento cu segun expertonan por tin vinculo cu videogaming. San Antonio College ta un di esunnan cu ta den proyecto pa duna informacion tocante videogaming, algo cu ta tumando luga actualmente.

Actualmente ta bisa cu tin varios manera pa blokia acceso riba tablet. “Mi ta kere cu hende ta wak gaming malo, pero e tin su aspectonan positivo tambe. E wega por instrui e mucha pa ta den futuro un IT of videogamer. E por inspira un proceso di bay scol, pa educa nan mes.”

Tambe cu nan tin sistema cu por blokia programa adulto, riba Playstation of Netflix por ehempel, pa asina ora di duna un mucha acceso, mester pone regla. Mester pone limite di un ora of 2 ora dependiendo edad di e mucha. Tambe por pone regla cu den weekend so mag y no den siman.

Segun Comenencia, e situacion mundial ta indica cu mester tin control. “Mester corda cu no ta solamente e bista ta bay atras, pero tambe e mucha ta perde oranan di su bida, su enfoke ta bira otro cu manera estudio of sport.”

Pa tur esunnan cu haya nan mes den un situacion unda videogaming ta causando un problema, por pasa libremente na CAA San Nicolas 584-7377. E prome combersacion delibera, pero nan por tin informacion.

E punto cu CAA lo enfoca pa e Carrousel pa 2020 ta videogaming, aunke tambe lo duna informacion riba droga y alcohol.