Astrid Britten, director di Biblioteca Nacional di Aruba y coordinador di conferencia asociacion di biblioteca, hunto cu Des Croes cabesante di departamento Arubiana Caribiana, tambe coordinador, a papia tocante e conferencia cu ta tuma luga dia 3 te cu 6 di juni den Renassaince Convention Center.

Esaki lo ta e di 49 conferencia di Asociacion den Caribe ‘Acuril’. E di 5 biaha cu Aruba lo ta sede y tin e honor di organisa e evento aki. E tema di e conferencia ta acceso y oportunidad pa un y tur, di con biblioteca den Caribe, archivo y museo ta duna aporte na desaroyo sostenibel (United Nations sustainable development goals).

Durante e conferencia nan lo enfoca riba esunnan cu tin pobresa, e centro di educacion, y sostenibilidad di e biblioteca. “Con ta bay integra strategia pa nos por logra mas di e meta aki, pa por contribui na sociedad, cu ta sumamente importante”, Britten a splica.

Lo tin 8 oradonan principal, cu ta esnan cu ta bay duna e charla. Nan ta: ministro di Educacion, Ciencia y Desaroyo Sostenibel Armando Lampe (RED); di Curacao Alcalá-Wallé, ministro di Educacion, Ciencia, Cultura y Deporte; profesor Jesus Lau di universidad di Veracruz, Mexico; Laurent Jean Pierre, ethnobotanista di St. Lucia; profesor Cees Hamelink, comunicacion internacional di universidad na Amsterdam; Maaike Toonen, di biblioteca nacional di Hulanda; Paul Geerders GO scol pa informacion na Hulanda;y di Merca, Jemi Laclé, manager di projecto, deal partnership y data analytics di World Bank Group.

Cu esaki, Britten a expresa cu kier duna aporte na desaroyo cu tin, pa wak con por contribui den paisnan den Caribe y Aruba con leu por yega cu meta desaroyo sostenibel, tambe ta duna apoyo na esaki.

Ta bay tin participante di afo, cu ta 22 hende di diferente pais cu ta biniendo Aruba pa atende. Tambe pa esunnan cu ta sinti identifica y ta haya interesante pa bay, por busca mas informacion riba e pagina di biblioteca mes si ta desea di participa.

Meta pa desaroyo sostenibel ta enfoca riba agenda 2030 di Nacionnan Uni, unda cu den e periodo te cu aña 2030 mester logra un of mas di e metanan aki, y e rol cu biblioteca tin pa logra ta importante. Britten a splica cu ta trahando caba. “Durante e conferencia ta bay tin showcase ,caminda ta mustra locual a wordo haci den diferente tereno y trahando hunto den e parti di desaroyo sostenibel.”

Des Croes tambe coordinador di conferencia, el a bisa cu Acuril ta presenta anualmente. Ta bay presenta e bendedonan cu ta sostene e actividad. “E 23 compania cu ta sostene biblioteca rond di mundo lo mustra nan producto den Caribe y con ta sostene e data di informacion. Lo tin sala di exposicion di e 23 companianan aki”, Croes a splica.

Banda di esey lo tin e parti di boulevard poster, unda cu tur investigacion y proyecto cu ta wordo haci den biblioteca den Caribe lo wordo presenta a base di poster di diferente tamaño, cu ta bira atractivo pa hende wak.

Lo tin un programa social pa tur participante cu atende na e conferencia, pa nan siña conoce mas di Aruba, wak e parti cultural, e parti di hende, esunnan cu ta contribui na e parti di conoce otro isla den Caribe. Nan lo bay wak e diferente museo rond di Aruba, Archivo Nacional, e bibliotecanan y centro di informacion di Aruba.

“Nos lo purba mustra kico Aruba ta ofrece den e trabou di biblioteca hunto cu informacion”, Croes a expresa. Pa finalisa, a bisa cu esunnan cu kier inscribi y sa e costo di evento, por bay riba pagina di biblioteca of na www.acuril2019aruba.com y acuril2019.loc@gmail.com. Lo tin entrada y informacion pa esunnan cu kier atende tur dia of si ta un dia so.