Casi tur caminda por tende algo di ‘green’ ta wordo menciona. Hopi biaha entre hendenan grandi di den comunidad unda cu sa tin diferente conferencia riba sostenibilidad. Green Education Symposium Aruba treci pa biblioteca nacional den pasado a trece informacion aki na scolnan secundario. Mirando e importancia e aña aki ta haci esey posibel pa scolnan basico tambe.
E simposio aki ta enfoca riba educacion di e muchanan, Bon Dia Aruba a puntra si e intencion ta pa e simposio no keda na algo anual solamente. Y si kisas tin oportunidad pa e bin den forma di un vak na scol. Segun Vocero di WEB Sra. Asja Dongen ta splica y partner di biblioteca nacional den e simposio, cu e pakete di educacion E-project cu WEB tin, a wordo ofrece na Bureau Curriculum Ontwikkeling y nan a tuma esey cu man habri. Aworaki no sa con leu e proceso ta, pero nan lo incorpora esaki den e vaknan pa ciclo basico. “Pues esey ta un cos cu ta sosodiendo. Segun mi sigui e desaroyo na e scolnan, e ta un topico bibo si, y no sa si ta den un vak specifico, pero mi sa cu durante aña escolar diferente scol ta tuma e topico di sostenibilidad como un proyecto den grupo pa muchanan traha cun’e.”
Segun director di Biblioteca Nacional Aruba (BNA), Sra. Astrid Britten, unabes cu mira e importancia y cu kier hinca esaki den e curriculum, kiermen cu e (educacion green) ta bay scol na un manera structural. Esey mi ta kere cu nan ta pone atencion na dje. Y cu nan lo ta wak e importancia tambe pa hinca esaki den e curriculum di scol, mi no ta kere esaki lo dura largo. Mi ta supone cu den vaknan manera ASW, cu ya parcialmente e ta hinca aden kisas. Y manera cu sa, tin algun scol cu a cuminsa na un scala chikito cu plantacion entre otro pa wak e importancia pa esaki”.
Di 5 edicion
Ronny Alders di BNA coordinador ‘Green Education Symposium’: “Esaki ta e prome lustro di Green Education Symposium Aruba. Dia cu nos a cuminsa cu un Green Education Symposium pa e studiantenan di scolnan secundario y educacion avansa, nos no a soña cu lo yega e prome lustro. E maestronan di scol, alumnonan, empleadonan di BNA mes a pidi pa ripiti e simposio educativo aki tur aña. Locual cu a haci bou di maneho di Sra. Britten a continua cun’e y e aña aki como regalo pa Aruba y educacion, a dicidi pa haci e simposio educativo aki tambe pa scolnan primario (scol basico)”.
Recientemente Sr. Alders y Sra. Britten tabata na un conferencia di American Library Association na Merca unda a topa diferente hende, entre nan un escritora di buki di mucha, cu a skirbi un buki poniendo enfasis riba sostenibilidad y comemento saludabel. E ora a pensa cu lo ta tremendo si por trece e informacion aki pa Aruba tambe, cual lo tuma luga. BNA ta haci esey posibel Sra. Dianne Venetta lo bishita Aruba pa prome biaha como un orador invita den e simposio.
Tema: “Sustainable water distribution and Organic Food”
A delibera y ‘brainstorm’ riba ki tema ta uza e aña aki, como cu tur aña tin un tema diferente. Den pasado a uza “Sustainable Energy, Sustainable soils” etc. E biaha aki a bisa cu a yega ora pa duna atencion na awa. Kico lo haci riba e mundo aki sin awa? Nada.
Oradornan invita
Banda di sra. Venetta di Merca, lo tin orador di Aruba Sr. Filomeno Marchena, Juneanne Gil di Guyana, Anne Frederique di Haiti y Hensley Martina di Corsou.
Fecha pa scol y publico
E fecha ta bay ta augustus 29, cual ta e apertura oficial y ta termina 9 di september. Pa dos siman largo, e scolnan di Aruba y prensa cu television y biblioteca ta bay ta e centro di Green Education Symposium na George Madurostraat na Oranjestad.
Pa publico general, biblioteca nacional kier a trece dilanti cu lo tin oportunidad pa publico tambe presencia e informacion educativo aki . Lo bay tin un anochi di lectura cu lo tuma luga dia 6 di september 7or di anochi na Biblioteca Nacional Aruba na Oranjestad. E oradornan cu ta bay duna nan lectura ta di Aruba, Guyana, Haiti y di Corsou. Pues e porta ta habri pa ken cu ta interesa pa ta presente. Entrada ta gratis.
Partnernan y oradornan
Partnernan den e di 5 simposio aki ta un grupo cu ta traha na diferente manera den comunidad promoviendo sostenibilidad. WEB, Elmar, Santa Rosa y Fundacion Festas, tur den pasado a sostene e simposio aki caba treci pa biblioteca.
