Ayera durante un conferencia di prensa pa medionan local, parlamentario Endy Croes hunto cu su abogado Anthony Ruiz, a informa cu el a gana e caso di casacion cu Ernst & Young a entama contra su persona aña pasa.
Su abogado Anthony Ruiz a duna di conoce cu nan a haya e noticia diabierna pasa cu Corte Supremo (Hoge Raad) di Hulanda a duna su veredicto unda 5 hues a ratifica e sentencia di e tres huesnan di Corte Comun di Aruba, Curaçao, St. Maarten y islanan BES, cu na januari 2018 a duna Croes rason cu Ernst & Young den nan investigacion pa directiva di fundacion Lotto pa Deporte encuanto posibel actonan ilicito di caracter financiero, a comete un acto ilegal contra su persona.
Di mesun manera, Ruiz a expresa cu Corte Supremo a bisa cu e acto cu Ernst Young a comete contra Croes tabata ilegal y el a sufri dañonan a consecuencia di e manera cu nan a actua den su contra, e sentencia di Corte Comun a bisa cu e rapport tabatin e meta di caba cu integridad di Croes y pa asina por a kita su persona di trabao.
“Ernst & Young a manipula e rapport, a hunga cu cifra,” abogado Ruiz a expresa. Segun e tambe, nan tabata haci traduccion di Papiamento pa Hulandes cu tabata manipula. E keho cu nan a entrega na Polis ta bisa cu nan lo haci un investigacion contra Croes pa sigura cu e mester bay cera, manera a sosode.
Tambe el a comenta cu den e caso di casacion Ernst & Young a bin cu e ponencia cu e ley di accounting na Hulanda no lo ta aplicabel na Aruba; segun Ruiz e cinco huesnan na Hulanda a bisa cu e reglanan na cual un registeraccountant mester mantene su mes, ta conoci na Aruba y cu tur registeraccountant mester mantene nan mes na e reglanan aki.
E hecho cu Aruba no tin su propio registro di registeraccountant no ta kita cu Aruba ta parti di Reino Hulandes cu e registeraccountant cu ta traha aki na Aruba mester mantene e reglanan cu ta existi na Hulanda y cu nan ta conta tambe pa Aruba.
Asina tambe Ruiz a sigura cu Ernst & Young no tin caminda mas pa cana den e caso aki y awor nan lo bay pa e siguiente fase, na unda nan lo haci un demanda pa daño y perhuicio y cu nan lo bay Corte un biaha mas contra Ernst & Young.
“Nos ta cla pa bringa, y si ta 10 aña nos mester bringa, nos ta bay 10 aña contra Ernst Young”, Ruiz a manifesta, refiriendo na e periodo di lucha cu a cuminsa desde e cambio di gobierno na 2009, tempo cu e directiva di Lotto pa Deporte a pasa pa man di un directiva nombra pa gobierno di AVP.
Di su parti, Endy Croes a expresa cu un grupo conforma pa Lotto, partido AVP y Ernst & Young tabata esunnan cu a forma manera el a bisa “e monster cu nos a bringa pa 10 aña”.
Croes tambe a sigura cu dentro di un of dos luna lo cuminsa cu otro bataya, pa por recobra e parti material, pero “esey no lo cura e daño emocional, imagen robes y impresion cu el a haya riba caya pa via di e hendenan aki.”
