(CBSNews)—Erythritol, cual ta un sustituto pa sucu uza den productonan “low-cal”, “low-carb” y “keto”, tin conexion su riesgo halto den ataca di curason, paro cardiaco y morto, segun un estudio nobo.
Investigadonan na Cleveland Clinic a studia mas cu 4.000 persona na Merca y Europa y a descubri cu esnan cu nivelnan halto di erythritol den sanger tin un riesgo mas halto pa experiencia e eventonan cardiaco grave aki. E estudio, cual a wordo publica dialuna den e revista Nature Medicine, tambe a descubri cu endulsante artificial por causa trombose.
“Nos estudio ta mustra cu ora participantenan consumi un bebida cu endulsante artificial cu un cantidad di erythritol haya den cuminda procesa, nivelnan halto den sanger por wordo observa pa varios dia despues—nivelnan mas halto cu esnan cu ta causa trombose,” segun Dr. Stanley Hazen den un comunicado di prensa. Hazen ta autor principal di e estudio y presidente di e departamento cardiovascular y ciencia metabolico na Cleveland Clinic.
Mayoria biaha ta recomenda productonan sin sucu cu ta contene erythritol na personanan sufriendo cu obesidad, diabetes of malesa metabolico como un tratamento pa maneha consumi di sucu y caloria. Erythritol ta un ingrediente mas uza den endulsantenan manera Truvia, por ehempel.
Hendenan cu e malesanan aki caba tin riesgo halto pa problema cardiovascular manera paro cardiaco.
Como contesta riba e estudio aki, director di e Conseho pa Control di Caloria Robert Rankin a conta CBS News cu e resultadonan ta “bay den contra cu decadanan di investigacion cientifico cu ta mustra cu endulsantenan manera erythritol ta safe, como a wordo proba pa permiso di regulacion global pa uza esaki den cuminda y bebida. E estudio aki no mester conta pa e populacion general, mirando cu participantenan den e investigacion tabata tin riesgo halto pa problemanan cardiovascular caba.”
Mientras cu e estudio no ta mustra causa definitivamente, contribuyente medico pa CBS News, Dr. David Agus, ta bisa cu “tin suficiente data pa pone bo preocupa.”
“Mayoria endulsante artificial ta pega na bo receptornan dushi pero no ta wordo absorba. Erythritol si ta wordo absorba y tin efectonan significante manera nos ta mira den e estudio,” Agus ta splica.
Endulsantenan manera erythritol a haya un aumento den popularidad den e ultimo añanan,” Hazen a nota, y e investigadonan a bisa cu mester estudio mas extensivo pa compronde e efectonan riba salud di hende.
“Malesa cardiovascular ta crece cu tempo, y malesa di curason ta e causa mas grandi di morto global. Nos mester percura cu e cumindanan nos come no ta contene contribuyentenan scondi,” el a remarca.
