Encuestanan ta mustra cu e coalicion Hulandes lo perde 8 asiento den Senado

(NLTimes)—E prome encuestanan di e eleccion Hulandes di Conseho Provincial a mustra cu e 4 partidonan cu ta forma un coalicion lo perde 8 di nan 32 asiento den e Senado Hulandes. E partido mas grandi den e cas ariba di parlamento por ta Boer Burger Beweging (BBB), cual ta un partido Derechista nobo forma pa representa e sector di agricultura, of un partido Iskierdista combina di GroenLinks y PvdA.

E 4 partidonan cu ta forma e coalicion, esta VVD, D66, CDA y ChristenUnie, tabatin un nivel di apoyo minoria caba den e Senado, cual ta rekeri pa nan traha cu al menos un otro partido pa haya aprobacion pa legislacion. E buraco a bira mas grandi ainda diaranson.

E coalicion a gana solamente 30.6% di e votonan diaranson, segun e encuestanan nacional di Ipsos y NOS. Esey tabata mas abou cu e 40,3% cu nan a gana na 2019. Esaki a causa cu e coalicion mester mira nan cantidad di asiento den e Senado baha for di 32 pa 24. E reduccion mas grandi a bin for di un caida den apoyo pa CDA, cual tabata spera di perde 4 di nan 9 asientonan. VVD por perde 2 asiento, probablemente D66 lo perde 1 asiento y ChristenUnie a perde 1 di nan 4 asiento. Como a resulta, e partidonan di coalicion kisas mester haci concesionnan pa faccionan Derechista of Iskierdista si nan kier aproba politica den e Senado.

A spera cu BBB lo gana 15 asiento danki na e eleccion, cual por haci cu nan ta bira e partido mas grandi den e Senado, despues di VVD cu nan 10 asiento. Pero GroenLinks y PvdA a uni hunto como un solo faccion den e Senado, cual por haci cu nan ta bira e partido of segunda partido mas grandi, un bes cu e votonan wordo conta.

E 4 partidonan lo mester gana apoyo for di BBB of di GroenLinks y PvdA. E dos partidonan Iskierdista ta priminti di traha hunto den e eleccion di 2023. Pero varios problemanan grandi ainda mester di atencion riba nivel nacional. Esaki ta inclui politica relata na e deficit di acomodacion, recepcion di refugiadonan y emision di nitrogeno. Cualkier di e tres por ta insuperabel, y por causa un collapse den Rutte su di cuatro gabinete, como Rutte mes a destaca.

Locual ta e asunto di nitrogeno, e partidonan Iskierdista no ta kere cu e coalicion a haci suficiente den nan metodo pa e cambio di clima y medio ambiente, mientras cu BBB, cual tin apoyo di campesinonan y negoshinan di agricultura, a mustra resistencia intensivo pa cualkier cambio cu por afecta nan bienestar na un manera negativo pa via di politica di medio ambiente.

Ta parce cu e perdedo mas grandi ta partido di Thierry Baudet, Forum voor Democratie (FVD). E partido Derechista tabata e ganado mas grandi den e eleccion di 2019, pero apoyo a cay for di 12 asiento na 2019 pa solamente 2 e aña aki.