85% di hobenan entrevista den e encuesta haci pa Universidad di Aruba a bisa cu nan ta considera nan mes adicto na Facebook, Whatsapp, Internet, Twitter, Instagram y otro medionan social. Un hoben di Aruba tin un averahe di 8 ora pa dia connecta cu medionan social. Esaki Ministerio di Asunto Social ta informa.
Minister encarga Paul Croes a mustra e importancia di e datonan aki, como cu esaki ta trece oportunidad pero tambe su reto. “Awor nos sa at least unda nos por haya e hobenan. E plataforma electronico, e cyber area aki ta na unda bo por intercambia ideanan, programanan, campanja y informacion cu nos hobenan. Nos hobenan ta hopi mas connected cu generacionan anterior.”
E estudio bao di guia di Profesor Ryan Peterson a wordo haci a peticion di minister pa asina acomula datonan riba norma y balornan di nos hobenan. Hobenan ta duna hopi importancia na nan propio felicidad y alegria. E informacion aki ‘sigur pa instancianan social y hudicial mester ta un eye-opener, como cu e presencia di nos hobenan den e espacio cybernetico aki ta trece peliger’, segun e relato.
