Manera ta conoci, STEPS ta un encuesta nacional di salud pa Gobierno di Aruba y Departamento di Salud Publico por haya dato y haci un analisis di e situacion actual di e salud di e comunidad. Ayera mainta minister di Salubridad Publico, Dangui Oduber a sigura cu esaki ta conociendo un retraso.
E ultimo encuesta STEPS cu a haci na Aruba tabata na aña 2006, pa loke ta importante pa actualisa e data pa por haci uso di esaki, guia e desaroyo, implementacion y tambe evaluacion di e Plan di Prevencion. “Nos ta consciente cu tin un gran parti di nos sociedad cu ta sufri di malesanan cronico, tin hopi reto na e momentonan aki. Pero sin data ta bay ta dificil pa nos por guia un direccion den prevencion,” minister Oduber a bisa.
E encuesta aki a cuminsa dia 4 di maart ultimo y na e momentonan aki nan tin un ekipo di Departamento di Salud Publico cu diferente encuestador cu ta selecta ken ta e personanan cu por participa, y si tur cos ta cana segun nan planificacion, esaki mester keda cla na fin di mei.
Sinembargo, Oduber a sigura cu e encuesta tin algun siman di retraso y nan no sa si nan por logra culmin’e den e fecha ey of e por keda cla den e di dos siman di juni.
Na redaccion di Bon Di Aruba a yega informacion cu supuestamente tabatin problema financiero pa paga e encuestadornan, pero segun minister Oduber a splica, nan a presupuesta casi 13.000 florin den e presupuesto di Departamento Publico pa cubri e promocion y e gastonan di tur encuestador. “Mi no ta kere cu esaki ta e problema. Esaki ta un hecho cu lo por ta cu encuestadornan no a haya nan pago na tempo pasobra gobierno normalmente no ta paga manera sector priva, pero tin placa presupuesta y esey nos a percura den e presupuesto di 2023. Kiermen nos ta bay dobel check kico lo por ta e hecho cu nan no lo ta cumpliendo cu e deadline,” el a comenta.
STEPS ta un investigacion haci den e poblacion bao factornan di riesgo cu por conduci na desaroyo di malesanan cronico no transferibel manera cancer, obesidad, presion halto y tambe diabetes.
STEPS ta un instrumento crea pa Organisacion Mundial di Salud y PAHO pa colecta e data, pa actualisa e maneho di programa di salud y tambe pa haci intervencion pa comunidad akinan na Aruba.
Pa haci e encuesta aki ta consisti di tres paso: e prome lo ta un bishita cu e persona scogi door di nan ta bay haya di e encuestador na e cas mes, unda nan ta bay yega cu nan ekiponan, nan ta bay midi e peso, haltura, presion, heup y cintura; y di tres paso nan tin cu haci un test di sucu y colesterol.
Di e forma aki e organisacionnan encarga cu e salud publico por ricibi un bista actual di e salud di e poblacion di Aruba y tambe pa nan por crea y haci adaptacion pa comunidad.
