E desempleo na 2015 compara cu 2014 a baha leve. Tin menos desempleo bou hende homber, pero mas bou hende muhe. Tin un aumento di 11.7% di e cantidad di inactivo.
Esaki ta informacion cu a sali for di un relato di Ministerio di Asuntonan Social, Asuntonan di Hubentud y Labor riba e encuesta bou hogarnan na Aruba cu a tuma luga den e periodo 31 di october 2015 te cu 27 di november 2015. Esaki ta di 5 biaha cu Departamento di Labor DAO a realisa e Encuesta di Forsa Laboral (EFL).
Prome resultadonan
E cifra di desempleo a conoce un caida leve di 7.5 porciento den aña 2014 pa 7.3 porciento den aña 2015. Aña 2015 a caracterisa su mes door di un crecemento economico chikito, tambe bou di sector di turismo (bou di esaki ta cay e sectornan di mas grandi di e mercado laboral Arubano manera Hotels and Restaurants, Groot- en kleinhandel y Onroerend goed, Verhuur en Zakelijke dienstverlening). Ta trata di sectornan cu ta wordo fuertemente influencia door di turismo.
Grafico 1 ta indica e desaroyo den cifra di desempleo entre 2011 y 2015.
Compara cu otro paisnan den nos region manera Curaçao (11.7 % october 2015), St. Maarten 9.2 % 2013, Barbados (11.9 % juni 2015), Jamaica (13.3 % dec 2015) y Bahamas (14.8 % november 2015) Aruba (7.3 %) hunto cu paisnan manera entre otro Trinidad y Tobago (3.5 % december 2015) y Bermuda (6,6% augustus 2015) ta entre e paisnan cu e cifra di desempleo mas abou.
Ora midi desempleo a base di genero ta demostra cu e cifra di desempleo masculino pa aña 2015 a baha di 8,5% pa 7,0%, mientras cu e cifra di desempleo femenino a aumenta di 6,4% pa 7,6%. Grafico 2 ta demostra cu e cifra di desempleo a baha pa di tres aña consecutivo
Grafico 3 ta demostra cu e cantidad di persona trahando a crece desde aña 2010. Entre 2014 en 2015 tin un disminucion. E cantidad di trahadonan compara cu aña 2014 a baha cu 1565 persona. Un disminucion di 2.9 porciento. E cantidad di persona trahando ta 51250 persona.
E poblacion laboral activo tin un total di 55576 persona y a disminui cu 1783 persona y na november 2015 esaki tabata 55576 persona. E caida aki ta principalmente causa pa un caida den e cantidad di esunnan trahando y esunnan desemplea.
E grado di participacion den aña 2015 a baha cu 3.2 punto porcentual compara cu aña 2014. E grado di participacion tabata 62.4 na aña 2015. Esaki tin di haber cu e hecho cu e poblacion laboral potencial (esunnan di 15 aña bay ariba) a subi compara cu e poblacion laboral.
E cifra di esunnan inactivo a subi cu 3516 persona den aña 2015, en comparacion cu aña 2014. Esaki ta un aumento di 11.7 porciento. E cantidad di esunnan inactivo ta 33,552. E cifra aki ta consisti principalmente di pensionadonan y esunnan cu ta bay scol.
Mas informacion di resultadonan di EFL por haya riba www.daoaruba.com
