Hulanda lo introduci ley riba e vacuna di COVID-19 y lo mester wak con su impacto lo ta pa henter Reino. Esaki tabata un di e temanan cu delegacionnan Parlamentario di Reino a discuti. Parlamentarionan di Reino a reuni cu otro den un encuentro informal via Zoom.

E reunionnan a inicia diaranson y a termina ayera, 7 di januari. E reunion digital tabata na luga di e reunionnan cu normalmente ta tuma luga dos biaha pa aña. E Interparlamentair Koninkrijksoverleg, IPKO lo mester a tuma luga na Aruba, pero pa motibo di COVID-19 a opta pa un encuentro virtual, y den un esfera mas informal pa medio di Zoom.

Durante e reunionnan cada Pais a haya oportunidad pa duna un presentacion di e situacion di cada Pais den cuadro di COVID y hiba discusion riba toca topiconan manera con ta ranca sali cu economia atrobe; e organo Caribense pa Reforma y Desaroyo; reforma Gubernamental; reforma financiero y economico; situacion socio-economico; economia duradero; y mercado laboral.

Cansancio di Corona

Segun Parlamentario Daphne Lejuez, e tabata hopi interesante pa tende di cada delegacion di cada pais den Reino, con nan a experiencia e pandemia. Tur cuater pais di Reino Hulandes ta experenciando ‘Corona-moeheid’ (Cansancio di Corona) locual ta pone retonan pa sigui mantene na reglanan di Corona. “Pero e vacuna ta trece perspectiva cu lo por percura pa mas trankilidad social.”

Tambe a papia tocante di resiliencia economico y seguridad alimenticio, unda cu ta importante pa stimula agricultura pa por suministra cuminda saludabel pa e poblacion. Aki a toca e retonan manera prijs di awa y clima, pero tambe oportunidadnan usando tecnologia pa por logra esaki.

Hulanda dentro di poco lo hiba un debate riba e implementacion di un ley pa haci e PCR-test y vacuna uno obligatorio pa por biaha pa Hulanda, y aki a trece dilanti pa tene cuenta con esaki no solamente lo afecta Hulanda, pero tambe considera con esaki lo por afecta otro paisnan den Reino.

Mas encuentro informal

Tocante di COHO, e islanan a duna di conoce cu mientras ta compronde y acepta supervision financiero pa por ricibi e Liquiditeitssteun, no tur medida den Landspakket tin “raakvlakken” cu e sosten financiero y/of ta relevante pa e capacidad di por paga back e lening. Tambe a toca e (falta di) rol di Parlamentonan di e islanan den e proceso pa yega na e Rijkswetten pero sigur tambe despues di yega na e acuerdonan y bay over na e ehecucion di e Landspakketen.

Riba su mes un bon reunion pa ta na altura di loke ta pasando den Paisnan den Reino, particularmente durante COVID cu ta un pandemia cu a afecta nos tur pareu, y unda por intercambia solucionnan y asina hunto nos duna otro sosten pa por re-start nos economianan, crea perspectiva y mas resiliencia pa futuro.

E sugerencia ta pa purba hiba reunionnan y intercambionan mas frecuente pa por compronde e situacion di cada Pais y siña di experiencia di otro y con por yuda otro miho pa hunto surpasa e retonan cu entre otro COVID a presenta.

Reunion informal

Segun Daphne Lejuez na Bon Dia Aruba, no a bin un resolucion manera normalmente ta e caso na final di cada IPKO, y e motibo ta cu e reunionnan tabatin un caracter informal, pero aparte di e sesion plenario, tabatin oportunidad pa trata topiconan separa. “Y durante e sesionnan aki nos a haya oportunidad pa intercambia mas profundo cu otro.” Lejuez a bisa cu el a sinti di e delegacion di Hulanda cu tin simpatia y empatia pa locual Aruba, pero tambe e otro paisnan ta pasando aden, ya cu e crisis di COVID-19 a bira uno economico social enorme pa e paisnan di Reino Hulandes den Caribe. “Pero nan a laga sa si cu nos mes mester traha hunto, incluso cu e otro islanan pa logra realisa e metanan proponi, en bes di bringa otro riba nivel politico.”

Riba e pregunta si e delegacion di Hulanda ta haya cu Aruba ta cumpliendo cu e condicionnan pa e sosten di likides, Lejuez a ilustra cu realmente e tema no a bin riba mesa specificamente, pero locual si e delegacion Parlamentario Hulandes a mustra cu nan ta sigui e progreso. “Nan preguntanan tabata hopi varia. For di e resolucion riba e asina yama ‘geschillenregeling,’ y si agricultura por ta un pilar economico realistico of mas bien uno pa abastece e consumo local, mirando e retonan. Tambe nos a papia riba e perspectiva di e vacuna, si esaki lo por brinda un impulso economico.” Lejuez a splica cu no solamente e vacuna lo tin impacto riba e malesa di COVID-19, pero e lo influencia economia tambe.”

Eleccionnan 2021

Tur pais di Reino Hulandes lo tin eleccion na 2021 y esaki sigur lo tin influencia riba e acuerdonan cu a cera cu Hulanda. Aruba apenas a cera e acuerdo cu Hulanda na November. Aunke Gobierno Hulandes ta sigui cu palabracionnan di esun anterior, pero hasta Secretario di Estado Raymond Knops a mustra cu no por bisa mucho mas leu cu locual a palabra te cu awor, mirando cu Hulanda lo tin un Gobierno nobo. Aruba lo tin eleccion na September. “Pero locual a si a bisa ta cu e lo ta un bon idea pa e Comision Interparlamentario di Reino tene reunionnan mas frecuente pa por sigui papia di e retonan y tambe oportunidadnan nos dilanti,” Lejuez a splica.

Potret: Daphne Lejuez via facebook.com/daphne.aruba