Awe tin un Encuentro Publico riba e tema di screening di Minister. Pero e no ta un Reunion Publico. Pa tal motibo mes, lidernan di fraccionnan di oposicion a manda un carta pa Presidente di Parlamento pa pidi pa trece e adaptacion den e reunion.
Motibo ta cu un Encuentro Publico no tin base legal, ni ta permiti miembronan di Parlamento pa drenta den debate cu e Minister. Un Encuentro Publico tampoco ta permiti Parlamentarionan pa entrega mocionnan.
Como tal, e lidernan di fraccionnan di AVP, MAS y Accion21, esta Mike Eman, Marisol Lopez Tromp y Miguel Mansur a manda un carta firma pa expresa opinion cu un Reunion Publico manera ta describi den Constitucion ta duna mas contenido na e proceso democratico.
Pa tal motibo mes e lidernan di oposicion ta pidi Presidente di Parlamento mr. Edgard Vrolijk pa cambia e Encuentro Publico pa un Reunion Publico conforme Constitucion di Aruba, y yama esaki den e periodo stipula tambe pa ley.
Esaki tabata un di e criticanan contra maneho di mr. Ady Thijsen como Presidente di Parlamento, esta cu mayoria reunion cu a tuma luga, particularmente den e Aña Parlamentario anterior tabata mas bien Encuentro Publico y no Reunion Publico cu ta limita tambe e trabao Parlamentario.
Mester bisa cu mr. Vrolijk na momento di a tuma cargo di Parlamento a bisa cu Parlamento no por sigui funciona manera a haci den ultimo 36 añanan. “Hopi cu a sinta como Presidente y cos a keda mescos,” el a bisa na momento di asumi e cargo.
Dia 13 di September ultimo mr. Vrolijk a bisa cu su tarea ta pa uni tur hende, trece confianza back den Parlamento cerca comunidad. “Reglamento di Ordo ta bieu y mester cambi’e, y mi ta spera cu tin e madurez pa trece cambio di e Reglamento di Ordo, cu ta rekeri cambio Constitucional.” Entre otro, e Presidente a bisa cu su tarea ta pa implementa mocionnan. Mester drecha procesonan, unda entre otro ta duna Parlamentarionan respet ora nan ta pidi Reunion Publico.
E Encuentro Publico ta programa pa cuminza 9or di awe mainta.
