Diaranson ultimo, a tuma luga un encuentro extraordinario organisa pa e Genootschap Nederland –Aruba den Nieuwspoort Den Haag.
Orador principal di e encuentro aki tabata Secretario di Estado, Raymond Knops. Un atardi interesante cu a conta cu presencia di entre otro, Minister Plenipotenciario di Aruba, Guillfred Besaril, Minister Plenipotenciario di Corsou, Anthony Begina, diferente miembronan di tanto Eerste como Tweede kamer di Hulanda y miembronan di Raad van State.
Tambe a conta cu e presencia di director di Cas di Aruba, Glenn Ling, e representante di Aruba na Europa alabes Ministro Plenipotenciario suplente, Eddy Paris, diferente profesornan conoci den nos comunidad, profesionalnan tanto Arubanonan of cu afinidad cu nos dushi isla Aruba residencia na Hulanda.
Segun e comunicado cu nos a ricibi ta indica, Besaril tabata tin e privilegio na habri e encuentro. Den su discurso e mandatario a probecha na comparti cu tur presente un saludo cordial di parti di Aruba su Prome Minister, Evelyn Wever – Croes. Pa loke ta e contenido mes di su discurso sr. Besaril duna un relato amplio di e actualidad Financiero / Economico di Pais Aruba. Den Besaril su disertacion a elabora di forma detaya riba e situacion di Venezuela y con esaki ta influencia nos economia y e reto continuo cu Gobierno di Aruba ta enfrenta pa mantene e trankilidad den comunidad. Gobierno di Aruba ta consciente cu no por tene e frontera cera pa semper y p’esey ta haciendo e preparativonan necesario. Gobierno lo introduci un sistema di ESTA – parecido na e modelo Mericano – den cual un persona cu kier bin Aruba for di Venezuela mester aplica pa e ESTA online.
Besaril a elabora riba e refineria di Aruba y Citgo. Mas importante, a elabora riba e intentonan concreto di parti gobierno riba e tematica “Futuro di Aruba y Refineria”.Mientrastanto Gabinete Wever – Croes a caba di firma un MOU cu Rivergroup pa yega na un hotel di luho na Baby Beach. Un inversion di mas di 200 miyon dollar cu sigur lo beneficia San Nicolas y vecindario. En combinacion cu Sector Primario cu di un ora pa otro lo ricibi un estimulo interesante y e proyecto di expansion di Aeropuerto Reina Beatrix (Gateway 2030), por conclui cu pais Aruba ta canando cu pasonan chikito pero firme den un rumbo economico stabiel. Conclusion cu Besaril ta ilustra a keda substancia recientemente pa tanto e expertonan di Standard & Poor’s como esnan di Fondo Monetario Internacional (IMF). “E confiansa di parti di Standard & Poor’s y IMF ta bek pa Aruba. Tanto asina cu e expertonan di IMF ta hasta premira un crecemento economico pa Aruba di mas o menos 3% den 2020. Nos ta sigur riba un bon caminda atrobe!” Besaril a declara.
Den su discurso e mandatario a toca e tema di gastonan di Personal. Un aspecto cu sigur tin atencion di Gobierno di Reino. Minister Besaril a elabora cu Gobierno di Aruba a baha gastonan di personal cu 6 miyon Florin den 2019 y cu den e plan 2020 – 2021 e gastonan lo sigui anualmente ta na un nivel responsabel. Por ultimo e mandatario a accentua cu Gobierno ta paga na interes un suma di mas o menos 230 miyon pa aña. Lamentablemente e Pueblo di Aruba no ta gosa di un interes preferencial manera si ta e caso pa nos ruman islanan di Corsou y Sint Maarten. Arubano ta conta cu e sosten di e politiconan Hulandes na brinda e Pueblo di Aruba un trato igual den Reino of por lo menos na duna un espacio na mehora e situacion financiero – economico di Aruba sin cu e nifica sacrificio exagera. P’esey e Pueblo di Aruba te ainda no ta compronde dicon e trato desigual aki.
Na final di su discurso, Besaril a gradici e directiva di Genoodschap Nederland – Aruba pa e invitacion y oportunidad pa na nomber di Gobierno di Aruba duna un bista di nos isla su actualidad financiero / economico.
