E delegadonan cu ta asisti na e prome foro academico di Comunidad di Estado Latino Americano y Caribense (CELAC) a subraya e oportunidadnan enorme di cooperacion economico, politico, social y cultural entre China y e paisnan di America Latino y Caribe.
Segun e Comision Economico pa America Latino y Caribe (Cepal), e delegadonan particularmente a reconoce e oportunidadnan aki, “den e contexto internacional actual marca pa incertidumbre, e efectonan di cambio di clima y e resureccion di tendencianan proteccionista.”
Ministro di Asunto exterior di Chile, Heraldo Muñoz, a papia di “e significado di tene un reunion di e indole aki den nos region pa prome biaha, apenas algun luna prome cu e di dos Reunion di Ministro di asunto exterior di CELAC y China, programa pa januari proximo na Santiago.
“Sin ningun duda, esaki lo ta un momento historico den sentido cu e lo permiti nos profundisa e lasonan na ambos banda ainda mas. E oportunidadnan pa cooperacion den diferente area ta hopi grandi,” el a declara.
E director general di e Instituto di Estudio Latino Americano di e Academia Chines di Ciencia Social (ILAS-CASS), Wu Baiyi, a indica cu mientras China y America Latino y Caribe por ta geograficamente distante, encuentronan manera e foro aki ta yuda pa fortifica laso entre ambos banda.
“Manera presidente Chines Xi Jinping a bisa, amistad por cubri distancia,” el a bisa, añadiendo cu cooperacion entre China y America Latino y Caribe ta “di suma importancia, specialmente den un mundo asina globalisa manera esun actual.”
Secretario ehecutivo di Cepal, Alicia Bárcena, a bisa cu “no tin miho tempo cu e presente, marca pa incertidumbre economico y politico y efectonan ambiental costoso den henter mundo, pa habri un debate entre China y America Latino y Caribe.”
Cepal a bisa cu e delegadonan, den diferente panel, a atende e reformanan economico na China y nan implicacion pa America Latino y Caribe, specialmente cu bista riba e di 19 Congreso Nacional di Partido Comunista di China, cu a cuminsa ayera na Beijing.
