Recientemente Departamento di Enseñansa Aruba (DEA) a organisa varios encuentro cu diferente directiva di scol y otro instancianan di importancia cu ta traha cu mucha. Durante e encuentro aki a papia tocante varios topico importante di siguridad na scol, entre otro resultado di varios investigacion cu DEA conhuntamente cu CBS (Centraal Bureau van Statistiek) a ehecuta den aña escolar 2017-2018 na tur scol preparatorio y basico tocante siguridad na scol.
Meta.
Meta di e encuentronan tabata pa presenta e resultado di dos investigacion cu a tuma luga tocante siguridad na scol preparatorio y basico cu a wordo ehecuta bou di cabesante, maestro y personal na mei/juni 2018. Alabes pa informa tocante e investigacion bou di tur alumno di scol preparatorio y basico cu lo tuma na dia januari venidero.
Tambe e encuentro tabatin como meta pa motiva e directivanan di scol pa conscientisa e cabesantenan, maestronan, personal y alumnonan pa coopera y participa cu varios investigacion cu lo tuma luga den futuro na kleuter y scolnan basico y alabes na scolnan riba nivel secundario (MAVO, EPB, Speciaal Onderwijs, etc.) pa asina sostene e Plan Nacional di Siguridad.
E resultado di e investigacionnan aki lo wordo uza den un Plan Nacional di Siguridad di scolnan na Aruba. Maneho Nacional di Siguridad E idea ta pa tur directiva di scol y e otro instancianan sostene, motiva, monitoria y yuda implementa e maneho nacional.
Departamento di Enseñansa Aruba lo aplica e proceso participativo pa concipia, implementa y monitoria e Maneho Nacional di Siguridad na tur scol di Aruba. DEA kier logra haya sosten pa implementa e Maneho Nacional di Siguridad a base di e proceso participativo menciona. Varios di e instancianan tin nan mesun plan di siguridad, pero actualmente no tin un plan nacional di siguridad na scol. Door di traha hunto cu tur directiva di scol y otro instancianan cu tin di haber cu mucha, DEA kier concipia un maneho uzando tur informacion y maneho cu e directivanan di scol tin caba.
Alabes DEA lo uza e experticio di tur e instancianan riba siguridad na scol y e resultado di tur
investigacion pa tur tipo di scol y nivel.
Departamento di Enseñansa Aruba a traha un formato pa e Maneho Nacional di Siguridad di scol cu lo wordo adapta segun e feedback ricibi di e directivanan di scol y e otro instancianan.
Conexion siguridad na scol y PEN 2030 Un di e strategianan di Plan Educacional Nacional 2030 ta pa aumenta e calidad den enseñansa di un forma duradero. Lo enfatisa riba un ambiente di siña hopi motivante. Un di e accionnan cu mester wordo tuma pa logra esaki ta door di tin un Maneho Nacional di Siguridad concreto y implementa esaki na tur scol di Aruba.
Colaboracion.
DEA ta conta cu e sosten di CBS y SIMAR y hunto nan ta trahando intensivamente cu otro riba e investigacion.
Investigacion.
E dos investigacionnan a tuma luga den e aña escolar 2017-2018 na mei/juni 2018 conhuntamente cu CBS (Centraal Bureau van Statistiek). E software cu a wordo uza pa haya e resultado ta “survey monkey”. Tur cabesante, docente y personal di scol a haya un code via e-mail pa asina nan por a yena e formulario di encuesta. Uzando e programa aki DEA y CBS a logra haya e resultado inmediatamente.
Presentacion investigacion di alumno.
DEA a presenta varios biaha e contenido di e investigacion cu tin planea pa wordo ehecuta bou di e alumnonan na tur scol preparatorio y basico. E investigacion ta planea pa tuma luga den aña escolar 2019-2020. Pa e investigacion aki 20 studiante di Universidad di Aruba (UA) y Instituto Pedagogico Arubano (IPA) lo sinta personalmente cu cada alumno pa haci e preguntanan di e encuesta. CBS a pone 20 tablet disponibel pa wordo uza pa esaki. CBS lo indica cuanto alumno di cada scol riba nivel di scol preparatorio y basico lo wordo entrevista.
Pa mas informacion por acudi na nos website [ea.aw] y busca Veilige School den e alfabet menu. Tambe por sigui desaroyonan relaciona cu enseñansa na Aruba a traves di Facebook, Twitter y Instagram @educationaruba.
