Durante conferencia di prensa na cas di cunucu Tan Tin, Minister di Cultura y Finanzas a presente un revista pa tur mucha di scol preparatorio y basico. Esaki ta relaciona cu e celebracion di Dia di San Juan/Dera Gay cu ta dia 24 di di juni proximo. E meta di e revista “E Cosecha di Juancho” ta pa nos sigui informa y educa nos muchanan riba e historia di San Juan. A traves di e revista aki ta haya informacion con esaki a inicia, su origen y con nos hendenan di Aruba ta celebr’e.
Den e revista ta haya informacion di entre otro, e historia di e celebracion Dia di San Juan/Dera Gay, e nificacion di bistimento di color geel y cora, e candela, musica y baile, nificacion di e gay y contamento di storia di antes cu tabata tuma luga durante San Juan. Ademas tin wega pa mucha, pintura y concurso cu e muchanan por participa pa gana premio. E revista aki lo wordo entrega via scol na 14 mil mucha. E mandatario ta hopi contento cu e interes e aña aki ta hopi grandi pa celebracion di Dia di San Juan.
Di parti UNOCA nan lo presenta un serie di videonan educativo di Dia di San Juan riba nan plataforma social y canalnan di television. Pa locual ta Comision Celebracion Dianan Nacional, lo ta encarga pa promove tur eventonan di San Juan, y tur instancia/organisacion tin chens te cu 19 juni proximo pa informa CCDN via su email adres ccdn@cultura.aw pa asina e evento wordo publica riba e calendario di evento.
Eventonan registra di Dia di San Juan/ Dera Gay 2023 te na e momentonan aki:
Centro di bario Playa Pabou, Centro di bario Noord, Centro di bario Savaneta, Fundacion Chico Harms na Centro di bario Brazil, Instituto Kateketiko Diosesano Aruba, Club Sport Boys y Jong Sanicolas.
E mandatario a gradici Archivo Nacional Aruba, UNOCA, Departamento di Cultura, Comision Celebracion Dianan Nacional pa nan cooperacion y tambe tur organisacionnan cu ta organisando eventonan pa Aruba por celebra Dia di San Juan/Dera Gay. Ademas ta invita henter comunidad pa asisti na e celebracionnan di Dia di San Juan/Dera Gay den barionan y biba nos cultura.
