E siman aki tabatin hopi speculacion tocante e futuro politico di Otmar Oduber, despues cu a keda confirma cu su plataforma politico Pais no lo bay proximo eleccion. Diamars, Oduber a confirma cu el a tuma over partido PPA.

Papiando cu noticiero online NoticiaCla, Oduber a bisa cu el a keda cla cu e tramite y a confirma cu ta tuma PPA over. “Mi tin e honor di por carga e partido, cu den su gloria tabata e partido mas grandi cu Aruba a yega di conoce, y lant’e back hacie e partido patriotico di orguyo y union na Aruba,” Oduber a bisa NoticiaCla.

El a bisa cu e lo busca sosten y apoyo na cas di su mayornan den un reunion na Ponton.

Oduber a bisa cu ta apenas diamars atardi cu tur cos a keda cla pa e tuma e partido over y bay eleccion.

Plataforma Pais

Pa algun tempo caba ex-minister y politico Otmar Oduber a duna di conoce cu e lo drenta e arena politico un biaha mas cu un plataforma nobo, esta Pais. Sinembargo, Oduber a confirma cu su plataforma nobo, Pais, no a logra keda inscribi pa e eleccionnan di e aña aki y pues e no lo ta participando den eleccion cu e plataforma aki.

Oduber a indica na NoticiaCla cu ta tuma un decision riba nivel personal y familiar. “Diaranson lo tene un reunion cu mi hendenan y participa esaki na nan pa nan pensamento y diaranson mes lo participa esaki a comunidad,” el a bisa na e portal.

Sinembargo, awo el a informa cu Plataforma Pais lo sigui existi como Plataforma y fungi como think tank di e partido politico.

Algun tempo atras rumornan tabata circula cu Sr. Oduber a ser acerca pa personanan cerca di partido MEP pa discuti traha hunto den e partido aki.

Lider di MEP durante un conferencia di prensa a clarifica cu e no tin motibo ni intencion pa acerca señor Oduber tampoco pa papia cune.

“Mi no a papia cu Señor Otmar Oduber riba e tema aki, mi no tin motibo pa hacie y lo mi no hacie tampoco. Y absolutamente ningun hende den MEP tin mandato pa papia cu Otmar Oduber pa subi lista di MEP,” e mandatario a enfatisa.

Pa mas di cuater aña caba Oduber ta pendiente pa cera e pagina pa loke ta trata caso Flamingo, den cual e ta sospechoso principal. Despues di a bay varios biaha corte y sali cu denuncianan di abuso cometi den e caso aki, na comienso di augustus corte a informa Oduber cu e tratamento di caso flamingo lo cuminsa dia 17 di november y ta spera cu pa dia 2 di december esaki lo yega su fin.

“Mi lo a prefera claro pa e caso cuminsa mas prome, pero despues di ta wardando mas cu cuatro aña caba, e tres luna aki mi ta kere lo pasa lihe y asina mi por defende mi mes di e acusacionnan sin base aki”, asina Oduber a declara den e comunicado.

AVP

Oduber a tuma su prome stapnan den politica den “Hubentud Activo y Consciente (HAC)”, e hala hubenil di AVP. El a subi lista di AVP como suplente na 1997. Entre 2001 y 2009 e tabata miembro di Parlamento di Aruba. Na 2009 el a keda nombra minister di Turismo y Transporte den e prome gabinete di Mike Eman. El a mantene e mesun cartera den segundo gabinete di Mike Eman, te ora cu el a renuncia dia 3 di november na 2016 pa motibo di un lucha interno pa poder cu algun otro minister. E siguiente aña, el a funda un partido nobo, POR.

POR
 Den eleccion di september 2017, POR a obtene dos asiento, y a opta pa forma un gobierno di coalicion cu MEP y ReD. Den Gabinete Wever-Croes I, Otmar Oduber a fungi como minister di Infrastructura y Medio Ambiente. Sinembargo, dia 17 di september di 2019 el a anuncia cu e tabata retirando di politica activo, retirando di su cargo como minister dia 12 di december 2019. E tempo ey, tabatin varios acusacion di corupcion den su contra relaciona cu caso Flamingo. E anuncio aki a sorprende un gran parti di nos comunidad, te hasta su hendenan mas cerca di dje. Tabata circula hopi rumor rond di e decision aki.

Segun e Oduber, el a planifica un salida for di politica diferente na cualkier otro circunstancia y politiconan den pasado. El a bisa e tempo aya cu e tabata convenci cu e ta retira for di politica den su miho momentonan, mirando e trabao cu a wordo haci y e aceptacion den comunidad. Otmar Oduber tabata un di e politiconan mas mediatico y popular durante e delaster decada.

Oduber a cuminsa politica cu 23 aña. No solamente el a dedica 22 aña so den politica, pero 18 aña di nan el a yega di haci’e den un posicion ehecutivo of legislativo. “Cu ta consumi bo y absorbe bo hopi pisa,” e ta admiti.

PPA

Na april di 2021, partido PPA a anuncia un lider nobo, esta Lissette Malmberg, cu a lidera e pais den eleccion. Esaki despues di fayecimento di Benny Nisbet, kende a lidera PPA pa mas cu 50 aña. Sinembargo, Malmberg no a logra gana un asiento pa PPA, y na januari 2023 a anuncia su retiro for di politica. “Na ki momento bo a stop di kere den bo mes? Unda bo a acepta e mentira cu cos no por, no lo cambia? Unda bo a entrega na cansancio y desapunto y bo a laga otronan tuma e rienda di bo destino y hiba bo unda bo no kier bay?” el a skirbi den un carta dirigi na pueblo di Aruba. “Mi a kere, mi a spera cu bo tabata cla pa un cambio di rumbo pa traha hunto pa restructura, reforma pa asina transforma nos nacion y reconstrui e caminda pa nos destino.”

Malmberg a bisa cu el a pensa “cu por ta for di “paden” den politica lo ta posibel pa trece un diferente forma di pensa, un cambio den nos liderazgo y gobernacion. Mi a tuma curashi pa drenta un area cu poco den sector priva kier drenta, pero mi no a realisa kico ta rekeri pa ta exitoso den politica na Aruba, y mi tin cu admiti cu ami no ta e persona indica pa esaki, pasobra mi contribucion y influencia ta miho inverti trahando den e area civico y social. Mi a conclui cu e ta tuma responsabilidad di cada un di nos como ciudadano y residente pa transforma un nacion. E no ta solamente un responsabilidad politico.” Asina el a anuncia cu e lo bay back na su trabao filantropico y den sector priva.