En bes di bin cu ‘macho language’: Gremio ta urgi presidente di Parlamento pa bin cu reunion awe

Tanto representante di Aruba Gastronomic Association (AGA), Sr. Jan Van Nes como presidente di Camara di Comercio (KvK), Satish Daryanani a urgi pa Parlamento di Aruba por scucha nan peticion pa bin cu un reunion urgente.

Sr. Van Nes a trece dilanti cu durante e reunion cu nan a yega di participa hunto cu stakeholder, caminda gobierno a informa riba e desaroyo di nan negociacion cu Hulanda, nan sector a expresa cu nan ta compara nan situacion conecta na un respirator. E ta haya cu e comparacion aki ta cuadra cu e topico cu nan a trata ayera riba situacion di cuido di salud hunto cu Asociacion di Dokter di Cas (HAVA).

Despues di e reapertura, e restaurantnan cu a habri tabata den un 25% di loke nan tabata produci na 2019. E unico motibo cu nan ta mantene habri ta e hecho cu nan ta ricibi subsidio di salario. Pues na momento cu nan no tin subsidio di salario, dificilmente nan por sigui habri. Y ta parce cu na e luna aki mes, si pais Aruba no yega na un acuerdo cu Hulanda, no lo tin subsidio di salario. E ta manera desconecta e respirator, el a laga sa.

P’esey e ta haya un lastima cu mirando e situacion dificil aki, presidente di Parlamento practicamente a bagatelisa un carta cu AHATA, ATIA y KvK a manda door di bisa cu e ‘hendenan aki mester spaar’. Sr. Van Nes a trece como ehempel e compania grandi KLM, cu e unico forma cu nan por a sobrevivi tabata pa medio di un subsidio otorga door di gobierno Hulandes, logicamente bao cierto condicion.

P’esey e representante di AGA a lamenta e forma cu presidente di nos organo legislativo a usa “macho language” pa situacionnan cu realmente no ta den nan poder. E ta haya cu e tipo di lenguahe aki, presidente di Parlamento por a us’e ya sea ora cu gobierno no a entrega nan cuenta anual di ultimo dos aña, of ora cu e presupuesto no a wordo entrega na tempo.

KvK

Sr. Daryanani a afirma cu nos sector di salubridad no tabata prepara pa niun tipo di epidemia. Ta conoci cu un gran parti di nos poblacion ta diabetico y e costo di atencion medico ta wordo paga via cupo di empleo. Y actualmente no tin suficiente oportunidad di trabao den e circunstancianan actual.

Presidente di KvK a declara cu economia di Aruba ta experienciando un caida di alrededor di 70% di actividad potencial. Mientras cu e data di GDP pa luna di juli y augustus no ta disponibel. Segun Sr. Daryanani no ta existi un plan alternativo y integral cu finanzas pa salba nos economia.

E ta sigura cu KvK ta capaz y ta dispuesto pa yuda nos comunidad. Pero den e caso aki gobernantenan mester haci di nan parti. El a laga sa cu KvK hunto cu e gremio di empresarionan di ATIA a pidi un reunion cu Parlamento pa awe 3 di september. Nan ta spera cu Parlamentarionan eligi pa pueblo, tambe por haci di nan parti. P’esey nan a bin hunto cu e otro sectornan pa expresa nan preocupacion real, y tambe pa nan brinda sosten na e sector di salubridad.