E hoben empresario y vice presidente di Camara di Comercio di Aruba, Kawish Misier a participa den un programa internacional organisa pa departamento di Estado di Merca. E programa Young Leader American Initiative tabatin e asistencia di 250 lider hoben di Latino America y Caribe.
Eynan el a haci contacto pa asina nos empresarionan local por comparti nan idea comercial cu otro empresarionan di otro pais, si cu e ta core e risico cu su idea ta wordo copia. Durante su estadia di casi un luna y mey na Merca cada un di e lider hobennan a wordo instrui tocante relaciona cu negoshinan na Merca. Tambe nan a comparti nan experiencianan y ideanan como lider empresarial hoben di e region aki. Den su funcion di vice presidente di KvK ta kere cu e tipo di contacto cu el a logra durante e programa aki na Merca por yuda nos empresarionan pa amplia nan vision ora cu nan kier realisa of tin un idea pa bin cu un negoshi na Aruba.
E miembronan interesa di KvK por papia cu e directiva pa asina link e empresario local cu otro empresario di otro pais. E ta haya cu e problema hopi biaha na Aruba ta cu bo tin un bon idea pero bo ta abstene di comparti bo idea cu otro empresario pa motibo cu bo tin miedo cu bo idea ta wordo copia.
Un factor ta cu nos ta un isla hopi chikito, pero si e empresario aki ta conoce otro empresario den otro isla of pais di nos region cu tin casi e mesun idea, simplemente KvK por crea e brug of contacto aki cu otro. Di e forma aki nan por comparti nan experiencia y siña di otro sin cu nan tin miedo cu nan idea ta wordo copia. Durante e ultimo siman, sr. Misier a haci esaki cu diferente empresario y e proceso ta andando di un forma exitoso. E ta kere cu esaki ta un forma pa stimula tambe nos economia. “Nos kier habri nos porta pa tur empresario na Aruba cu kier tuma contacto cu otro empresario den Latino America y Caribe, nan por bin cerca nos.”
