Segun un carta interno cu a sali di WEB Aruba NV, e empresa estatal lo a stop di retene e recorte di salario di su empleadonan, pasobra lo a resulta cu varios di e demas empresa y entidadnan estatal no ta cumpli cu nan compromiso di contribui na e fondo di solidaridad pa funda pago di e compensacion ofreci na e personanan desemplea cu ta cualfica pa haya e compensacion cu Fase ta ofrece.
Banda di e carta cu a sali di WEB, a surgi riba internet tambe un lista di compania y entidad estatal, cu nan contribucion na Fase, o den cierto caso, nan falta di algun contribucion, o un contribucion minimo cu no ta cuadra cu nan tamaño economico.
Riba esaki ya a sali un recado di prensa di NV Elmar, den cual ta duna splicacion cu e compania a retene e placa di e salarionan, pero cu a tene esaki den e compania pa yuda mehora e cashflow interno, cu a cay bastante a base di e caida den consumo di coriente, principalmente di parti di sector priva, manera hotelnan cu ta cliente importante di e empresa.
Mientras tanto, sindicatonan a cuminza reacciona riba e situacion aki, cu un rueda di prensa awe, diamars, pa 15:00. Nos ta keda pendiente pa mas reaccion riba e noticia aki.
