Empresa “offshore” por funciona totalmente bou structura legal na Aruba

Despues cu a wordo conoci e caso yama “Panama Papers”, minister di Finansa sr. Angel Bermudez a declara na Bon Dia Aruba cu keto bay e centronan financiero rond mundo lo keda existi, ya cada un di nan tin su specialidad.

Panama como otro pais ta keda como un centro financiero internacional pa menciona nos continente. Pero tin mas centro financiero na Medio Oriente y Oriente manera Macau. Na Europa tambe entre nan Madeira, Hulanda.

Pero loke si e paisnan mester combati –segun minister Bermudez-  ta e caracter y aspectonan ilegal y te hasta e aspecto criminal cu tin biaha e tipo di structura huridico aki ta wordo uza.

“Nan t’ey pa via cu tin un necesidad pa nan den e mundo comercial internacional”, el a bisa. E ta reitera cu e preocupacion ta cu organisacionnan relaciona cu mundo criminal tambe ta haciendo uzo di nan. “Esey bo tin cu ta alerta riba dje”, segun e mandatario.

E mandatario a bisa cu empresa offshore por funciona totalmente bou un structura legal na Aruba.  E ta indica cu e tipo di empresa “offshore” tin su beneficio, pero e problema ta e uzo cu personanan di baho mundo ta haci cun’e; y esey ta loke mester keda vigila y te hasta cierto momento combati.

Aruba ta importa tur cos y e tipo di empresa aki ta facilita legalmente e tipo di operacion internacional aki. El a indica cu nos tin comerciante cu ta importa cu tin un cuenta na Merca, ya cu e ta facilita pa e comerciante paga fei di su mesun cuenta na Merca, unda mayoria di productonan ta wordo importa en bes cu cada bes e tin cu paga desde Aruba. 

Pero e tipo di empresa aki por duna bo cierto momento idea pa bo haci cierto transaccion cu no ta legal; y esey ta punto cu cada pais mester fortalece su instrumento di control pa supervisa  y evita ilegalidad.

Revision y control

E oficinanan manera PWH, KPMG, etc… tin globalmente nan propio reglanan di aceptacion tanto di clientenan como di trabou cu mester pasa den un revision of screenmento prome cu nan ta acepta un cliente nobo of un trabou nobo. Pero tin companianan mas chikito cu pa tin acceso na e placa nan ta haci cualkier cos.  

E ta haya cu tur loke ta importante den e mundo financiero aki ta “reputacion”. E institutonan local cu ta supervisa entre nan Banco Central, MOT, OM (Ministerio Publico), nan mester haci nan trabou ora cu nan ta ripara cu tin participantenan di e sector ey cu no ta tene nan mes  na e reglanan dañando imagen di e pais.

“Contra nan bo tin cu actua. Esey mi no tin duda riba dje,  pasobra ta nan ta daña pa bo den exterior”, asina minister Bermudez a bisa.