Empresa estatal ta ‘independiente’…Ora ta conveni gobierno…

E reunionnan cu a tuma lugar ayera den parlamento no a trece e claridad cu partidonan di oposicion lo a desea encuanto e contrato entre WEB Aruba NV y Eagle LNG pa suministro di gas natural, pero a trece claramente dilanti con ta para cu e forma con ta eherce poder politico y gubernamental den e pais aki.

Pa cuminza, nos a haya henter un splicacion extenso di con ‘corporate governance’ ta funciona. Segun nos promer ministro el a impone esaki desde cu e ta goberna, pa reclama e merito ey y pa duna nos di comprende cu gobierno no tin nada di bisa WEB den e deal cu Eagle LNG, supuestamente. Pero tur code bunita no ta cambia e structura legal di un compania, un sociedad anonimo (NV), cu a keda mescos. Y e realidad ta cu gobierno di Aruba ta representante di Pais Aruba, como accionista unico di Utilities NV. Y Utilities NV ta accionista unico di WEB Aruba NV. Kico ta e caso? Cu e companianan aki no t’ey pa nan propio beneficio. Cu Pais Aruba, como e ‘ultimate beneficial owner’, representando comunidad, sigur y net den caso di asuntonan strategico, segun e maneho nacional estableci, tin di bisa den maneho di e companianan y por instrui nan pa sigui e maneho aki. Awor, nos promer ministro ta desea pa Aruba kere cu a tuma e decisionnan aki na nivel di WEB sin cu mas na halto den e organisacion a preocupa cu esaki, pasobra lo ta asunto pa dicidi ‘eybao’? Un contrato di 20 aña, cu su consecuencianan bon o malo pa e consumidor na Aruba, no ta asunto di gobierno? Laga nos pone e cos bon cla: si ta berdad cu tur esaki a tuma lugar sin conocimento di e ministronan, anto mester denuncia nan pa ‘plichtsverzuim’ den nan funcion; di incumplimento cu nan responsabilidad di vigila y cuida interes di e ‘ultimate beneficial owner’ cu ta: nos comunidad!

Un di e puntonan riba cual sí a bin claridad ta e intencion cu gobierno tin cu e ubicacion di e punto di entrega di gas na Aruba, esta riba tereno di refineria. E ministro encarga den e gabinete actual cu e cartera di energia, poniendo e discusion un banda si ta su persona ta e actual ministro responsable o su colega Promer Ministro, a vocifera cu e motibo pa pone e instalacionnan di LNG riba tereno di RdA ta pasobra gobierno ta carga e ilusion di habri e refineria algun dia. E ilusion ta keda cu e reapertura di e refineria, operando riba gas natural, segun e ministro, lo haya finalmente un operador. Ta parce cu mas e hechonan di bida, tocante posibilidad di sobrevivencia di e refinerianan grandi den region ta montona dilanti nos, mas e ministro, cu nunca a ser tilda di ‘kennis van zaken’, ta insisti den su ponencia cu e sí ta bay logra. Aki tin un contradiccion. E por sigui kere esey, y hunto cune e resto di e gabinete aki. Simplemente e mesun hechonan cu durante mas di un decada caba ta impone nan mes y a percura pa e situacion actual unda cu tur e refinerianan grandi regional ta fuera di operacion, lo defini futuro di e monton di chatarra cu esun di Aruba a para bira. Consecuencia di tur esaki ta finalmente cu e plannan pa trece LNG na Aruba por keda pega na nivel di gas pa WEB so; e parti di e refineria no lo concretiza. E critica riba e ministro y e gobierno aki no ta cu nan ta kere den fantasma di pasado so. E problema mas grandi ta cu e fantasma ta stroba nan di desaroyo un plan drechi pa futuro pa nos pais pa loke ta suministro di energia y mas en general un maneho strategico di uso di recursonan clave pa economia y comunidad. Nos no mester un gobierno cu tin dolor di nek di tanto wak atras, sino uno cu ta traha cu dedicacion y tino riba nos futuro.

Asina a keda cla cu no tin un vision claro riba desaroyo di energia alternativo y esey no ta un sorpresa, en todo caso no pa esnan cu ta sigui e asunto aki den ultimo añanan. Nos a pasa den dos periodo di gobernacion, di ocho aña di hopi papia, hopi scuma y nada mas. Pero e ultimo periodo mas recien no a trece un cambio den esey, al contrario. Si nos tira un vista awe riba e cifranan di produccion di WEB, nos por mira cu e aña aki energia solar, na aeropuerto y San Nicolas (?) supuestamente, a entrega 1,1% so di e 109 MW di average diario pa e aña te awor… nan no ta produci? Como consecuencia awor ta solamente 15.2% tin di energia alternativo, cu ta bin di e parke di molina na Vader Piet: nos no ta avanzando at all…

E temor ta cu, unavez e acuerdo pa usa gas natural ta vigente, no lo bay tin iniciativa pa energia alternativo, pasobra e practica di cuatro aña ta siña nos cu e atencion pa esey no ta e fuerte di e gobierno aki. Unavez a logra e contrato aki, ignorando e problemanan cu por acompañ’e, y usando e ‘independencia’ di empresa estatal pa laba man, lo dura varios aña pa mira e iniciativanan cu nos mester pa futuro.