Minister di Finanzas, Economia y Cultura, Xiomara Maduro a ricibi bishita di dos hoben emprendedor David Kock Jr. di 17 aña y Daniel Kock di 16 aña hunto cu nan tata David Kock.
Durante e encuentro aki e dos hobennan aki a presenta Minister Maduro nan producto di koffie ‘Kompa Nanzi’ traha localmente. David Jr. y Daniel na edad hoben a establece un compania di koffie ‘Kompa Nanzi’ cu ta procesa y produci koffie localmente. E bonchinan di koffie ta 100% arabica, certifica organico, artesenalmente tosta y empaketa localmente. E nomber di e koffie ‘Kompa Nanzi’ ta pa simbolisa cu e koffie ta un producto crioyo.
‘Kompa Nanzi’ ta un koffie cu no tin mester di agrega suco na dje y ta bunita empaketa. Riba e paki tin e figuranan di e historia di Kompa Nanzi y tambe un historia cortico tocante Kompa Nanzi. Pronto e koffie ‘Kompa Nanzi’ lo ta obtenibel rond Aruba.
E mandatario ta masha orguyoso di e dos hobennan emprendedor David Jr. y Daniel, cu ta un bon ehempel y inspiracion pa otro hobennan. Dos hoben cu apoyo di nan mayornan a tuma e curashi di bini cu un producto local y lanta nan propio negoshi.
Pa Minister Xiomara Maduro tabata un placer di a reuni cu e hobennan emprendedor y ta desea e David Jr. y Daniel hopi exito cu nan compania ‘Kompa Nanzi y a gradici e hobennan pa contribui na economia di nos Pais na un edad asina hoben.
