Banco Central di Aruba a publica recientemente cifranan di entrada di gobierno te cu november 2021, a base di cual Bon Dia Aruba a recoge e cifranan di diesun luna di aña, y a haci un comparacion cu e añanan anterior, 2019 y 2020, te na e mesun fecha ey (fin di november). 

E tendencianan señala anteriormente den varios articulo di mesun caracter, a sigui mesun rumbo, marcando un mehoracion di entrada di diferente tipo di impuesto (invoerrechten, accijns, BBO/BAVP), cu ta mustra riba un mehoracion di e clima economico. Tur indicador presenta den e resumen aki, cu excepcion di loonbelasting, a mustra avance, tanto den comparacion cu 2020 como cu 2019.

Loonbelasting no ta mustra un mehoracion, kedqando bao di nivel di ambos aña anterior, pero esaki tabata anticipa. Mientras na 2020 a logra recoge Afl. 219,4 miyon na loonbelasting, e aña aki a calcula un suma total di Afl. 195,7 miyon pa Presupuesto 2021. Te cu november a haya 87.3% di loke ta anticipa pa 2021, cu perspectiva pa no yega na e suma calcula. Mester tene cuenta cu e eliminacion di subsidio di salario lo tin su efecto riba entrada di loonbelasting den e dos ultimo lunanan di aña. Te cu november entrada di loonbelasting ta na 70% di loke a haya na 2019, señal cu empleo no ta na nivel anterior ainda.

Entrada Total

En total entrada gubernamental a aumenta, compara cu luna di november 2020 y 2019. Por observa cu entrada di impuesto na 2021 te awor ta un poco mas halto cu e aña anterior, pero no mucho mas (101,2%).

Impuesto

Den Tabel 2 aki bao ta presenta e cifranan actualiza pa diferente tipo di impuesto, te cu november 2021, compara cu e mesun periodo di 2019 y 2020.  Por observa cu loonbelasting despues di 8 luna ainda ta na 70% di loke e tabata na 2019, y na casi 85% di loke a registra aña pasa. Di otro banda, tanto impuesto di importacion como accijns y BBO/BAVP ta mustra mehoracion compara tanto cu 2019 como 2020. Pa tur tres e categorianan aki a registra un nivel cu ta mas di 100% di loke a recoge na 2020, mientras cu compara cu 2019 ta mustra un mehoracion mas modera. BBO/BAVP ta na un nivel di alrededor di 90% di loke e tabata na 2019, y compara cu 2020 ta mustra di ta na 127.9% di 2020, un señal cla cu economia ta bay den bon direccion, a pesar di e lunanan di augustus y september cu tabata menos pa motibo di e brote di Covid-19.

Empleo

For di e cifranan menos alentador di loonbelasting, aunke den Presupuesto 2021 a tene cuenta cu esaki, cu lo ta mas abao cu na 2020, por conclui cu empleo no a bolbe (ainda) na e nivel unda e tabata. Ademas e efecto di eliminacion di loonsubsidie lo aparece despues den e cifranan di december 2021 y januari 2022, ora e pagonan di november y december bira conoci. Tambe por anticipa cu e actual brote di e variante Omicron lo tin consecuencia pa empleo den e lunanan venidero. Di tur manera lo bay dura bastante pa por mira e cifranan di loonbelasting di 2019 atrobe.

Cifranan di SVb tabata mustra cu empleo oficialmente registra pa na e banco di seguro social dia 1 di october 2021 tabatin ainda un diferencia di alrededor di 1.500 cupo di trabao menos cu januari 2020. Por nota si un aumento di empleo entre januari 2021 y 1 di januari 2022, cu ta e cifra mas reciente cu actualmente SVb tin disponible. Actualmente tin 40.077 persona registra na SVb, mientras cu un aña pasa, januari 2021, tabatin 38.208 persona registra, un mehoracion di 1.869 persona. Pa loke ta empleo, relacion di trabao, tin hende ta traha mas cu un trabao, tabatin na januari 2022, 2.635 cupo di trabao mas registra. Comoo referencia por bisa cu na januari 2020 tabatin 41.339 persona registra, mientras cu tabatin 42.982 cupo di trabao registra. Conclusion ta cu falta ainda pa yega na e situacion pre-Covid, loke no por ta un sorpresa.

Banda di e cifranan di empleo oficial ta keda e preocupacion pa e cantidad di empleo informal. Esaki ta ocasiona un aumento di poder di compra, pero di otro banda no ta contribui ni na loonbelasting ni na e fondonan social.  Si e tendencia aki tin di haci cu aumento di trabao informal anto lo mester aumenta control riba actividad economico, pa gobierno no ta perdiendo innecesariamente ingreso, mientras su situacion financiero ta sigui dificil.