Empleadonan publico a completa curso cu obhetivo pa crea institucionnan fuerte

Un total di 73 ambtenaar cu a participa na diferente curso di e proyecto ‘Capacity Building for the Implementation of the SDGs in Aruba ,’ esta Creacion di Capacidad pa Implementa SDG’s na Aruba, a ricibi nan certificado e siman aki.

E grupo a ricibi un total di 207 certificado. E evento a tuma na luga na Universidad di Aruba, cu tabata un di e partnernan di e proyecto, cu ta carga pa e Comision Nacional di SDG y su Director Jocelyne Croes, MSc, hunto cu CON-INSTITUT Public Sector GmbH.

E curso a prepara e empleadonan publico pa ta miho prepara pa asina colecta data y estadistica pa asina formula maneho efectivo, programacion y maneho.

Mundo ta cambiando, y cu cambio di clima, pandemia, politica y otro aspectonan ta influencia bida. E Agenda pa Desaroyo Sostenibel 2030 ta duna un cuadro global pa tuma accion pa asina yuda den prosperidad, proteccion di e planeta y su hendenan, pa medio di e 17 obhetivonan di desaroyo sostenibel. Tur nacional rond mundo ta confrontando retonan economico, social y ambiental y Aruba no ta excepcion.

Institucionnan fuerte y resiliente por responde na retonan sin precedencia y e SDG’s ta elemental pa e futuro prospero y sostenibel di Aruba. Institucionnan mas fuerte na Aruba cu ta tuma decision informa, ta planea y maneha nan trabou miho, y ta rekeri inversion lihe. Data y estadistica ta forma e fundeshi crucial pa logra esakinan, como cu nan ta permiti decisionnan basa riba bon informacion.

E 73 empleadonan publico di diferente departamento a participa na e prome ronda di preparacionnan online. E di dos ronda y training riba data y estadistica a tuma luga na Juli. E cursonan a permiti e participantenan acumula conocemento riba determina vision basa riba evidencia y strategia, planificacion operacional y maneho, ademas di maneho basico y reportahe. Mas ainda, uso y diseminacion di data ta elemental pa logra maneho y programa efectivo, pa asina yega na institucionnan mas fuerte.

Sin e esfuerso pa traha riba capacidad, procesonan y structura den e areanan aki, como tambe crea colaboracionnan sostenibel, lo no por logra obhetivonan sostenibel. A cera un colaboracion cu Universidad di Aruba, pa sigura cu ta continua e proceso di crea capacidad tecnico y maneho cu ta basa riba evidencia y programacion. Tur material di e cursonan a bay pa Universidad di Aruba cu despues lo por facilita e cursonan den futuro.

Segun e Director di e Comision Nacional di SDG, Jocelyne Croes, na momento cu haci inversion adecuado y sabi, crea institucionnan capaz y empleadonan publico cu ta cla pa trece cambio, Aruba lo ta miho ekipa pa bira un pais prospero y sostenibel.

]