(nltimes.nl) – Aeropuerto Schiphol ta sigui tin dificultad cu falta di personal y 88% di e empleadonan ta preocupa pa motibo di con nan ta bay maneha e multitudnan di zomer e aña aki, un encuesta di sindicato FNV a descubri di 427 empleado. E sindicato ta preocupa cu e carga di trabao halto ta causa ausencia grandi y risico di seguridad, segun NOS a reporta.
Un guardia di seguridad na Schiphol y miembro di FNV, Chiyo Blumming, a bisa NOS cu casi tur dia e ta haya un e-mail puntrando si e kier traha un turno adicional. “Ayera mes nos a ricibi e-mailnan cu nan ta bay inclui vouchers pa turistanan,” el a bisa. Blumming ta gusta su trabao, pero e cantidad di trabao ta demasiado, el a bisa. “Bo tin cu por conforma cu bo no ta bay t’ey presente dianan di fiesta, por ehempel. E siman aki mes nan a pidi mi pa no tuma mi pause. Y bay baño tambe ta un problema pasobra e ora un hende tin cu bin pa cubri mi.”
“Poco poco pero sigur, hende ta bira malo. Nos ta preocupa cu nan lo collapse,” Jaap de Brie di FNV Aviation a bisa. Esey lo pone mas trabao riba menos empleado, resultando den mas ausencia pa motibo di malesa. “Y e tempo di zomer no a ni cuminsa ainda.”
Dos aña pasa, falta di personal den seguridad y maneho di maleta a causa filanan grandi na Schiphol y miles di bishitante a perde nan vuelo. Manehado di maleta Tony Roomeijer a bisa NOS cu e situacion no ta na e mesun nivel aki e aña aki y cu ainda nan ta manehando e presion bon. “Pero no mester bira mas cayente pasobra despues lo tin retrasonan.” Roomeijer ta bisa cu tin biaha e ta bin trabao pa 6or di mainta, come desayuno pa 8or di mainta y despues e ta traha henter e dia sin pauze.
FNV a bisa e aeropuerto cu mester resolve e falta di personal lo mas lihe posibel. “E cantidad di trabao no ta sostenibel y si esaki ta continua, pa nos e ta nifica cancelacion di vuelonan pa e salud di e personal.”
Schiphol a bisa NOS cu e condicionnan di trabao di empleadonan y e cantidad di trabao tin e “atencion pleno” di e aeropuerto. “Nos ta gradici cu sindicatonan manera FNV ta sigui monitor esaki y duna nos feedback valioso basa riba nan descubrimentonan,” un vocero di e aeropuerto a bisa. “Nos ta den discusion continuo cu e sindicatonan y tur compania activo na Schiphol, incluyendo companianan di seguridad, pa sigui mira con por mehora e calidad di trabao na Schiphol.”
