Ayera mainta un grupo di empleado di Departamento di Infrastructura y Planificacion (DIP) na Wayaca a inicia un accion dilanti oficina di e departamento. E empleadonan ta malcontento cu maneho di e director, dr. Haime Croes, y a haya asistencia di sindicato SEPPA pa nan ‘walk-out’. Edmundo Marlin a acudi na e sitio den representacion di e sindicato.

Aparentemente e empleadonan a expresa nan malcontento cu e director den un carta na Promer Ministro Evelyn Wever Croes, cu tin e departamento bao di su encargo desde e destitucion di ministro Marisol Lopez Tromp. Deseo di e empleadonan ta pa atende nan kehonan directamente cu e mandatario, ya cu nan a sinta caba cu e director, pero ta sinti cu nan no a haya respuesta satisfactorio.

Minister presidente, Evelyn Wever-Croes a reacciona urgiendo ambos partido pa sinta na mesa. Segun el a declara na medionan di comunicacion local, el a acerca director di DIP pa scucha di dje tocante e asunto, y asina a informa SEPPA pa cuminsa dialoga cu e director. El a informa cu maske no por sinta na mesa pa motibo di restriccionnan di Covid-19, si no haya solucion pa e problema, e lo institui un comision pa atende cu esaki. Di antemano a pidi director di Departamento di Recurso Humano y di Bureau Integriteit pa participa den e dialogo, segun el a informa medionan di comunicacion local.

Director di DIP, Haime Croes, ‘no ta na altura’
 “Mi mes no a haya ningun carta y no ta na altura di ningun keho riba mi maneho”, Croes a indica na otro medio di comunicacion local. El a bisa cu e carta di e trahadonan kehando di su maneho interno, cu Wever-Croes a manda p’e, a yega como un sorpresa.

Segun Croes, durante e proceso pa restructura e servicio di su departamento pa cumpli cu normanan di integridad a cuminsa un investigacion riba varios empleado, algun di cual ta na cas pendiente e resultadonan di e investigacion. Ta investigando iregularidad den proceso di otorga tereno.

“Mi ta reuni regularmente cu empleadonan. Ami tin un maneho di porta habri cu tur colega aki ‘den, p’esey e protesta ta straño pa mi”, Haime Croes a sigura.