Recientemente, e team completo di Aruba Conservation Foundation (ACF) e organisacion di conservacion di naturalesa independiente consistiendo di 49 empleado dedica y pasiona pa naturalesa, a forma parti di diferente cursonan pa asina eleva conocemento y habilidad riba e tereno di prome auxilio y seguridad.
Seguridad di e empleadonan di ACF y bishitante di e areanan natural ta importante pa ACF pa asina garantisa un area di trabou sigur y tambe un team ekipa pa duna prome auxilio. Pa e motibo aki ta sigui inverti no solamente den diferente materialnan di seguridad pero tambe brindando cursonan pa capcita e team pa asina por asisti den caso di emergencia.
A traves di un serie di diferente curso y tayer cu a tuma lugar den luna di juni y juli 2024, empleadonan di ACF ta eleva nan conocemento riba topiconan importante di Fire Extinguisher Safety y recertificacion di Heartsaver First Aid CPR AED cu ta forma parti di ACF su compromiso continuo na seguridad di su empleadonan y bishitantenan.
Den colaboracion cu BeSafe4Life Consultancy y ImSan Aruba, ACF a organisa diferente sesion obligatorio pa empleadonan por ekipa nan mes cu e ultimo conocemento pa por responde efectivamente na diferente emergencianan cu por ocuri. Esakinan ta varia entre diferente sorto di candela y con pa haci uzo di un Fire Extinguisher y alabes traha riba nan habilidad di por duna asistencia di prome auxilio den veld en espera di ayudo medico profesional. Door di priorisa seguridad, e empleadonan ta eleva nan habilidad pa asisti bishitante den caso di emergencia y proteha naturalesa asina cultivando un ambiente di trabou mas sigur y resiliente. Por ultimo, e compromiso na seguridad ta keda un prioridad pa di e manera aki haci areanan natural protegi accesibel pero tambe sigur.
Banda di e diferente curso y tayernan enfoka riba seguridad, ACF cu sosten financiero di Aruba Tourism Authority, tambe ta den e proceso pa instala diferente borchi di regla y regulacion nobo den e areanan natural protegi pa di e manera aki comunica cu e bishitante riba e comportacion desea ora di bishita e areanan natural protegi, tanto pa seguridad di e bishitante pero tambe pa conservacion di nos naturalesa. Tambe ta den proceso final pa cuminsa restaura diferente trapinan localisa den Parke Nacional Arikok cu tambe lo eleva e seguridad y experiencia di e bishitante.
“Invertiendo den nos empleado nan conocemento, habilidadnan hunto cu e materialnan necesario, especialmente riba e tereno di seguridad ta crucial pa nos organisacion. Mi ta hopi orguyoso di e team pa nan dedicacion y e atencion profundo cu a wordo duna den e cursonan aki, den tur e parti teoretico pero tambe e parti di practica. Mi tin tur confiansa cu e cursonan aki lo permiti pa nos empleadonan haci nan trabou na e mihor manera posibel asina garantisando seguridad di nos empleadonan, bishitantenan y nos naturalesa”, Tyson Lopez, Director General di ACF ta comenta.
Pa conoce mas di Aruba Conservation Foundation, por fabor bishita www.acf.aw of bishita Facebook, Instagram, of LinkedIn. Pa conecta cu e team, email info@acf.aw.
