Encuesta ta un instrumento tricky

Nos a topa cu un discusion interesante e siman aki. Un di e parlamentarionan di e partido grandi di e coalicion no ta asina convenci cu e plan di e ministro encarga cu enseñansa pa hinca enseñansa publico den un fundacion, ta un bon idea. Esey riba su mes ta bon. E ta trece dilanti cu ta importante pa scucha esunnan trahando den e sector. Y en berdad ta corecto pa scucha e parti interesa aki, esey no ta nada mas cu practica bon gobernacion. No core tuma decision sin duna esunnan concerni un oportunidad pa trece nan opinion dilanti y tambe haci caso di aspectonan cu eventualmente bin dilanti, cu ta di importancia pa e proceso programa.

Sin embargo, lo mester ta cla for di inicio tambe cu no ta asina cu e opinion mayoritario di esunnan envolvi automaticamente ta dicta loke ta bay sucede. Por tin motibo valido pa scucha, y scucha bon, y a pesar di esey dicidi di haci otro. Y pakico esey ta asina? Pasobra nos no mester confundi e principio democratico general, cu un afan pa den tur cos laga e mayoria dicidi. Y tin un motibo masha fundamental pa no semper bay tras di e opinion di e mayoria di empleado den e sector ey, y esey ta cu tin mas interes pa tene na cuenta. Ta demasiado simplista pa pretende cu ta e maestronan so ta e parti interesa aki, djis pasobra nan ta traha na e scolnan concerni. Tin un interes general tambe, cu ta mas grandi, y esey ta e interes publico, di mayor y nan yiunan, y no solamente e muchanan cu ta bay e scolnan ey actualmente, sino esunnan cu den futuro lo haci uzo di e facilidadnan aki. Ta traha plan semper cu bista pa futuro, y ta necesario evalua seriamente kico nos ta mira como interes di esunnan cu ni sikiera a yega na e porta di scol; pa nan tambe mester cuida nan interes. E tarea aki di wak dilanti, analisa y evalua kico lo ta e desaroyonan, y con lo ta miho pa atende un cierto asunto, esey ta loke ta spera di gobernacion. No solamente di e ministro concerni, sino tambe di parlamento, di e funcionarionan publico consulta, esunnan cu ta dirigi e scolnan.

Y den tur esaki nos ta kere cu ta na su luga pa adverti pa un instrumento di midi opinion, e encuesta, cu por facilmente resulta den un arma di doble filo. Nos por haci encuesta, den e caso specifico aki tambe, y kico lo ta e resultado? Nos por bisa awor caba cu probablemente un gran mayoria di e maestronan lo opta pa mantene e status actual cu nan tin. Independiente di e consideracion cu esey por ta en realidad e opcion miho pa scoge, of no, esaki ta bay ta e resultado di un encuesta, pa e simpel motibo cu mayoria di hende, y sigur empleado publico den cualkier pais, no gusta cambio. Cualkier experto den diseña y ehecuta restructuracion y modernisacion den un aparato gubernamental lo admiti inmediatamente, cu e problema mayor nunca ta pa analisa y diseña un structura y proceso administrativo nobo, cu bista pa futuro. E problema mas grandi semper ta pa logra cu e empleadonan ta haya oportunidad pa bisa loke nan tin di bisa y duna nan sosten unda en berdad nan por yuda mehora e procesonan, pero mester ta masha cla tambe cu e decision cu si of no un cierto cambio ta bay tuma luga, simplemente no ta nan call. Pasobra aki tambe mester tene cuenta cu no ta nan so ta stakeholder: e persona cu ta haci uzo di e servicionan gubernamental ta un interesado importante cu mas tanto ningun hende ta puntra nan pa nan opinion. Pero fracaso o exito ta depende semper di tene debido cuenta cu tur dos banda di e medaya aki.

Ta p’esey cu nos mester ta hopi critico ora cu ta uza e instrumento di scucha opinion a traves di un encuesta, tambe pasobra tin ora e no ta e instrumento corecto pa uza. Nos por ilustra esey bon cu e ehemplo di e siman aki, unda otro ministro ta maneha un encuesta pa check con malcontento e empleadonan ta cu nan director, mey mey di un conflicto. Esey probablemente, manera bisa anteriormente, ta duna bo e resultado cu bo ta busca. Pero esaki ta implica ignora e derecho di e director, cu a ser manda cas pa dos siman, di haya un investigacion imparcial pa evalua ta ken ta fout. Mescos cu ta busca pa sa si el a haci su trabao bon, ta importante pa averigua si su contrincantenan a haci nan trabao. De paso sea dicho tambe cu e vakantie obligatorio cu a aplica ta parce hopi riba un verkapte schorsing, violando su derechonan. Nos no ta trece esaki pa simpatia cu e persona, pasobra nos no conoce personalmente, pero un encuesta no ta e manera pa atende e asuntonan aki.

Finalmente, nos no ta kere cu un fundacion ta e unico manera pa maneha enseñansa publico, pero e ta un manera. Sin embargo, e no ta un garantia contra influencia politico.