Empleado spirito o mediocre… Huez so ta para nan…?

Den un tempo relativamente corto tabatin dos caso cu a duna testimonio con den e pais aki ministro(nan) ta goberna sin tuma na cuenta e reglanan mas basico di gobernacion (drechi). Un di nan tabata e caso di un persona, cu tabata campañador di e ministro encarga cu Infrastructura te december 2019, cu ken e persona a firma un contrato laboral segun derecho civil, unda e tabata encarga cu, segun e tabata alega, pasa rond y observa estado di caretera y mata, tambe di tereno erfpacht.

Segun su propio declaracion, e no tabata coordina ni comunica cu e departamento cu normalmente ta haci esaki, esta DOW, sino cu e tabata haya su ordennan den un envelop di e mandatario concerni mes. E tabata raporta exclusivamente na e ministro mes. Pa esaki e tabata ricibi un salario di mas di 4.000 florin pa luna.

E problema a surgi tempo cu e siguiente ministro a tuma rienda di e ministerio y no tabata encanta cu e ‘reliquianan’ di e gobernacion di su antecesor, cu despues durante un reunion di parlamento el a yama e casonan di ‘trahador spirito’ cu nunca el a haya pa mira na su despacho, mucho menos na un di e departamentonan bao di su custodia. A detene pago di salario y seguidamente a sigui tambe su retiro, terminando e relacion di trabao cu e tabatin cu e anterior ministro, pa ken el a campaña durante ocho aña, segun e mes a declara na Corte.

E caso sumario cu el a entama den un intento pa haya su trabao back a resulta… wel, sumamente sumario, ya cu huez no a ni perde tempo pa bay den e argumentonan cu e abogadonan di gobierno a trece dilanti. A base di loke abogado di e persona retira a bisa, huez a huzga cu e retiro tabata completamente na su lugar, bisando den su veredicto cu e circunstancia describi pa e persona mes, ta duna huez di pensa cu su nombramento tabata un tipo di “patronahe politico di e ministro di e tempo ey, unda [demandante] no solamente a keda nombra den un funcion crea specialmente p’e, cu un contenido no describi, pero unda [demandante], manera Land a declara, en realidad tampoco (…) mester a haci ningun trabao, mientras si tabata paga tur luna un salario di Afl. 4.050,00.” Duna proteccion na e tipo di caso di patronahe y mal uso di fondonan publico aki pa un mayoria den parlamento tabata mas importante cu para firme pa integridad y bon gobernacion: Manera e cancion di Ruben Blades ta bisa: “Prohibido Olvidar”.

E otro caso a tuma lugar den e dianan aki, unda e ex-director di empresa estatal Serlimar a bay Corte pa pidi declara su retiro nulo. Den e caso aki tambe huez den Promer Instancia, den caso sumario, a dicidi cu e demandante no tin caso y cu e retiro propina pa e directiva di e empresa estatal ta hustifica. Diferente den e caso aki ta cu tabata trata di un empleo berdadero, cu un trayecto di solicitud pa yega na un candidato cu ta fit e job description cu e empresa a propone. ‘So far, so good’ nos por bisa, mirando cu en todo caso no ta trata di un asunto asina flagrantemente en contra di tur regla di bon gobernacion manera esun anterior. Sin embargo, aki tambe tur sorto di cos a bay robez. Un di e promer asuntonan cu e medio aki a ripara tabata cu e persona riba su CV practicamente no tabatin experiencia al caso y ademas no tabatin ningun estudio superior termina; su diploma di HAVO tabata esun mas halto cu e por a mustra… Nos conclusion di e tempo ey tabata cu su capacidadnan profesional no por tabata cuadra cu loke e funcion ta exigi. Sin embargo, e ministro di e tempo ey tabata sclama cu e lo tabata e persona idoneo… Tempo a duna nos razon. Ta parce cu exigencia di educacion y experiencia, den e ambiente politico venena aki, solamente ta conta pa e yiu di tera cu bo no kier, y no pa e stranhero cu NO tin e papelnan, pero sí tin e confianza di e mandatario concerni. Aki no ta solamente e ministro ta carga culpa, sino henter e hunta di supervision cu tabata na soño, o ausente, o…?

Nos preocupacion ta keda cu nos no ta mira un fin na e practicanan aki. Mientras cu e palabra ‘transparencia’ a bira algo masha comun pa expresa na cualkier momento conveniente, e realidad ta keda cu e procesonan dentro di gobernacion y tambe e entidadnan semi-estatal ta keda un misterio pa nos como ciudadano. Nos mester keda contento anto cu loke ta bira conoci a traves di e tipo di caso aki den Corte, unda sikiera por bisa cu nos sistema hudicial no a baha na e nivel di e poder ehecutivo. Un punto positivo ta sigur cu bo no por bay cerca huez cu un contrato cu un mandatario a firma den secreto cu bo, anto kere cu e ta na bo banda. Tin pregunta cu a keda: Con e persona aki tabata haya pago di Finanzas? Departamento di Recurso Humano a duna nan bendicion? Si no, e no por a cobra… Y, cuanto spirito mas tin? ‘Prohibido olvidar’…