Despues cu gobierno a ricibi un rapport preliminar di Fondo Monetario Internacional (IMF) Minister di Finansa y Economia, Xiomara Maduro, a referi na henter e discusion cu tin riba gasto di personal.

“E informacion cu nos a trece dilanti no ta pa ataca e empleado publico,”el a bisa. Pero e mandatario ta haya cu si e informacion aki ta crea un escenario pa bin cu un debate balansa riba dje. Specialmente ora cu ta wordo bisa cu como dunado di trabou gobierno no ta cumpli cu empleado publico.

Beneficiona.
E mandatario a señala cu baha gasto di personal no ta nifica manda e empleadonan publico cas of baha salario, sinembargo como gobierno nan mester tuma decision responsabel pa pone e gasto di personal pagabel y manehabel.

Pa tal motibo nan mester tin un bista amplio y concreto di e situacion actual. Igualmente riba e discusion cu gobierno no ta trata bon su empleadonan, el a mustra e desigualdad entre e sector publico y e sector priva, caminda e prome di nan ta gana mas, nan tin mas compensacion y beneficionan.

Pa loke ta e compensacion of bashi premie pa cumpli cu nan otro aña, gobierno mester destina di su presupuesto un suma di 2.1 miyon florin pa cumpli cu e subida di e beneficionan aki manera e ta proyecta.

Otro compensacion tin di haci cu vakantie uitkeuring, kerstbonus, y diferente toeslag, kindertoelage, seguro medico di AZV plus otro cobertura extra manera fisioterapia, dentista, logopedista, odontologia, bril, ayudo psicologico y psikiatrico, etc..

Ademas dianan di vakantie cu ta depende di e funcion cu e empleado publico tin y cu ta cuminsa cu 19 te cu 30 dia di vakantie pa aña. Igualmente 13 dia di ATV.

Nan tin otro beneficionan manera dianan di BVVD, entre otro pa casamento propio y di famia. Pa ricibimento di casa of yiunan. Otro beneficio tin di haci cu empleado publico ta ricibi un pago di 100% ora di meldziek (AO) y te nan por keda maximal 4 aña AO.

Apesar di e situacion di finansa publico -segun e mandatario- gobierno a salvaguardia y cumpli cu tur e beneficionan cu empleado publico ta gosa di dje. Pero cu e mesun rosea minister Maduro a bisa cu gobierno tin su reto financiero, caminda gasto di personal ta uno grandi. El a reitera cu a trece esaki djis pa trece un idea di nan responsabilidad pa cumpli cu e gasto aki, y no pa trece un malcontento entre sectornan di nos empleadonan na Aruba.

IMF y gasto di persona.
Fondo Monetario Internacional (IMF) no solamente a traha un rapport preliminar dunando un panorama den su investigacion riba e gasto cu gobierno ta destina pa nan personal di e sector publico.

Un suma halto di un 12% di nos GDP of nos producto interno bruto ta bay pa cubri gasto di personal di gobierno. E ta un componente grandi di nos presupuesto hunto cu e pago di interes riba nos debe nacional cu ta un di e cuestionamento cu Hulanda ta bin formulando via supervision financiero di CAft.

Minister di Finansa y Economia, Xiomara Maduro a referi na esaki un dia prome cu Prome Minister, Evelyn Wever-Croes a tene un reunion cu conseho di minister di Reino, caminda e mandatario a logra pospone e intencion di Hulanda di bin cu un ‘aanwijzing’ (instruccion di Reino) riba pais Aruba. Minister Ruiz-Maduro ta considera e rapport di IMF importante cu lo mustra e ruta caminda gobierno lo bay traha pa atende cu gasto di personal. Ya cu e rapport aki no solamente ta trece un bista riba gasto di personal, sino cu IMF ta duna gobierno algun recomendacion y tambe nan a traha un modelo pa gobierno ora cu decision ta wordo tuma, kico esaki ta nifica pa e gastonan di personal relata den nos GDP. Pues a base di e informacion aki informacion responsabel lo wordo tuma, el a bisa.