Recientemente e sindicatonan cu ta representa empleado publico y semipublico a duna di conoce cu nan, en vista di no a ahaya un solucion satisfactorio pa nan exigencia di kita e reduccion di salario di e empleadonan cu nan ta representa, lo bay tuma dos dia liber cada luna. Esaki como compensacion pa e reduccion di salario, si esaki keda asina. Gobierno, despues di e a menaza cu accion contra esnan cu tuma parti na e accion aki, pero despues a mustra disposicion pa discuti e tema cu e sindicatonan, pa yega na un areglo. Con esey ta bay cana no ta conoci ainda, pero ta interesante pa analiza kico ta e situacion actual pa loke ta dia liber pa e empleado publico.

Segun e ley cu ta regla vacacion pa empleado publico (Landsverordening vakantie en vrijstelling van dienst ambtenaren (AB 1998 no. GT 22), e cantidad di dia pa aña ta varia entre 19 y 30, segun nivel di salario y posicion. Como cu gobierno ta traha normalmente den un siman laboral di 5 dia, por deduci cu esnan mihor paga den gobierno tin seis siman di vacacion pa aña. Esnan cu ta traha den un orario diferente, por ehemplo anochi o den fin di siman, ta cay den un categoria mas halto cu loke ta toca nan a base di salario, es decir, si nan lo tin normalmente 22 dia, anto nan ta haya e siguiente categoria mas halto cu ta 25 dia.

ATV-dagen

Banda di e dianan liber segun ley tin, a base di un acuerdo cu e sindicatonan, un areglo di intercambio di salario pa dianan liber, e conocido ‘ATV-dagen’ (ATV= Arbeidstijverkorting). E cantidad di dia ta na e momento aki 13 pa aña. Un parti ta ser tuma colectivamente, e resto individualmente, segun operacion di e departamento ta permiti. Tambe tin e dianan di fiesta nacional cu actualmente ta 11, si conta dia di Labor aden, a menos cu e cay riba un diadomingo.

Exigencia di sindicatonan

Cu e actual menaza di e sindicatonan, pa cuminza traha dos dia menos pa luna, e total di dia cu un empleado publico lo no ta na trabao ta bira minimo 56 (19+13+24), o mas di 11 siman pa aña, o maximo 67 dia (30+13+24), cu ta mas di 13 siman pa aña. Esaki sin conta dianan di fiesta nacional.

En total gobernacion lo ta fuera di operacion 104 dia (diasabra y diadomingo), mas e dianan cu accion sindical lo ta haci operacion practicamente imposible cu ta 24. Conta acerca ainda e 11 dianan di fiesta nacional, y por conclui cu gobernacion ta cera completamente pa 139 dia pa aña. Ademas tin e problema di falta cronico di personal riba e dianan cu si ta habri, si cada empleado lo ta ausente por lo menos 56 dia y maximo 67 dia pa aña. 56 dia lo ta mas cu un cuarto parti di e dianan habil pa aña.

Consecuencia pa gobernacion: mas mal servicio

Ta dificil pa imagina cu gobierno, despues di e aventura mal pensa di e ATV-dagen, awor por bay permiti mas dia liber, sin cu esaki ta bay afecta servicio na e publico severamente. Na e momento aki caba redaccion di Bon Dia Aruba ta haya keho di varios empresa, cu ta sufriendo bao di e tardanza cu por ehemplo e procesonan di peticion tin, pa diferente asunto. Entre nan ta destaca permiso pa establece empresa (Asunto Economico), y permiso di residencia pa empleado (Dimas y DPL). E tardanza te awor tabata relaciona cu e crisis di Covid-19, loke a paraliza varios proceso administrativo pa basta tempo, pero awor ta bin un menaza extra acerca den forma di departamento sin suficiente personal, mientras di otro banda gobierno no tin recurso pa emplea mas hende tampoco.

Ademas mester compara tur e luho di dia liber aki cu e situacion den sector priva, di apenas 15 dia liber, tambe pa esnan cu ta traha 6 dia pa siman, unda mester gana e placa pa mantene henter gobernacion.